Ibyo wamenya kuri Valentina Vassilyeva umugore wabyaye abana 69

Ibyo wamenya kuri Valentina Vassilyeva umugore wabyaye abana 69

Iyo bavuze umugore wabyaye abana benshi birashoboka ko ikikuza mu mutwe ari umugore uzi wabyaye abana 12 cyangwa 15. Niba hari umugore uzi wabyaye abana 15 aba ni bake cyane umugereranyije n’umugore ufite agahigo ko kuba yarabyaye abana benshi kurusha abandi bose ku Isi.

Umugore ufite agahigo ko kuba yarabyaye abana benshi kurusha abandi bagore bose bo ku Isi ni Umurusiyakazi witwa Valentina Vassilyev. Uyu ni umugore wa Feodor Vassilyev. Igitangaje kuri uyu mugabo ni uko adafite umugore umwe. Afite abana 87 yabyaye ku bagore babiri gusa barimo 69 ba Valentina.

Valentina aba bana be 69 ntabwo yababyaye inshuro ahubwo yabyaye imbyaro 27. Yabyaye inshuro inye abyara abana bane, abyara inshuro 7 abyara 3, arongera abyara inshuro 16 abyara abana babiri.

Umugore wa kabiri w’ uyu mugabo we yabyaye inshuro 6 abyara babiri, arongera abyara inshuro 2 abyara batatu bose hamwe baba 18.

Valentina nta nshuro n’imwe mu mbyaro 27 yigeze abyara umwana umwe. Ibi bimugira umugore wanditse amateka adasanzwe yo kubyara abana benshi kurusha abandi bagore bose bo ku Isi.

Feodor Vassilyev, umugabo w’uyu mugore wabyaye abana 69 yavukiye mu Burusiya ahitwa Chouïa mu 1707 apfa 1782. Uyu mugabo yapfuye afite imyaka 76.