Igisirikare cya Congo cyishe abarwanyi 2 kinafata mpiri 5 ba RED-Tabara baza guteza umutekano muke mu Rwanda

Igisirikare cya Congo cyishe abarwanyi 2 kinafata mpiri 5 ba RED-Tabara baza guteza umutekano muke mu Rwanda

Igisirikare cya Repubulika ya Demokarasi ya Congo FARDC, cyatangaje ko kishe abarwanyi babiri kinafata batanu b’umutwe urwanya u Burundi uzwi nka RED-Tabara ndetse ujya uninjira mu Rwanda.

Mu mpera za Nyakanga uyu mwaka wa 2021, Igisirikare cy’u Rwanda cyashyikirije icy’u Burundi abarwanyi 19 b’uyu mutwe wa RED Tabara bafatiwe mu Karere ka Nyaruguru muri Nzeri 2020.

Igisirikare cya Repubulika ya Demokarasi ya Congo FARDC, kiratangaza ko kuri iki Cyumweru tariki 10 Ukwakira ari bwo kishe abarwanyi babiri b’uyu mutwe ndetse gifata abandi batanu.

FARDC ivuga ko abo barwanyi baguye ahitwa Kibirizi ho mu kibaya cya Rusizi Teritware ya Uvira, intara ya Kivu y’Epfo.

Umuvugizi w’igisirikare cya Kongo muri aka karere, Majoro Dieudonne Kasereka avuga ko abo barwanyi barashwe bari bavuye i Burundi bagiye gufasha umutwe wa Mai Mai Kijangala usanzwe ateza umutekano mucye abaturage batuye mu kibaya cya Rusizi.

Ku ruhande rw’umuvugizi w’inyeshyamba z’Abarundi za Red Tabara, Patrick Nahimana, anyomoza ibivugwa n’igisirikare cya Kongo ko hari abarwanyi ba Red Tabara bishwe abandi barafatwa.

Bernard Kadogo, umuyobozi wa sosiyete sivili mu kibaya cya Rusizi ashimira igisirikare cya Kongo cyarashe abo barwanyi b’Abarundi bari bagiye gufasha Mai Mai Kijangala uri Rugeji mu misozi iri haruguru ya Luberizi.

Uyu umuyobozi atangaza ko Mai Mai Kijangala akoresha rumwe mu rubyiruko rw’abarundi ruba ruvuye i Burundi mu kunyaga inka, gushimuta abantu ndetse no kunyaga abagenzi baba bari mu modoka ziba zivuye mu mujyi wa Uvira zijya mu mujyi wa Bukavu.