Igisirikare cy’u Burundi cyahakanye cyivuyinyuma gucumbikira abateye mu Rwanda

Igisirikare cy’u Burundi cyahakanye cyivuyinyuma gucumbikira abateye mu Rwanda

Itangazo ryasohowe n’Umuvugizi w’ingabo z’u Burundi (FDNB) rihakana ko ubutaka bwa kiriya gihugu bwakoreshejwe n’abagabye igitero muri Nyaruguru.

U Rwanda ruvuga ko igitero cyagabwe n’abantu bataramenyekana baturutse mu Burundi, cyaguyemo abagera kuri 4 mu bakigabye, ndetse gifatirwamo batatu. Muri kiriya gitero hakomerekeyemo abasirikare batatu b’u Rwanda.

Herekanywe ibikoresho byafashwe n’imirambo y’inyeshyamba zarashwe. Mu bikoresho byafashwe harimo ibyifashishwa ku rugendo n’abasirikare byanditseho ko ari iby’u Burundi.

Itangazo ry’ingabo z’u Burundi rigira riti “Ingabo z’u Burundi, FDNB zinyomoza amakuru yatangajwe na Minisiteri y’Ingabo (mu Rwanda) ku mbuga nkoranyambaga ko u Burundi bwahaye ubwihisho inyeshyamba zagabye igitero mu Rwanda mu ijoro ryo ku wa gatanu rishyira ku wa gatandatu tariki 27 Kamena 2020.

Rikomeza rigira riti “Ubutaka bw’u Burundi ntibushobora kuba ubwihisho ku bantu bitwaje intwaro bashaka guhungabanya ABATURANYI.”

Rivuga ko ingabo z’u Burundi FDNB zifite inshingano yo kubungabunga umutekano mu buryo buhoraho ku rubibi rw’u Burundi n’abaturanyi.

Ku ruhande rw’u Rwanda ariko nta gushidikanya ko abateye bavuye i Burundi ndetse bahunga basubirayo, byemejwe n’abaturage bavuze amwe mu mazina y’abo bazi bari basanzwe baza muri Nyaruguru.

Ikindi gihamya ni ibikoresho bya gisirikare byafashwe byanditseho ko ari ibya Leta y’u Burundi.

Ibikoresho byafatanywe inyeshyamba byanditseho ko ari ibya Leta y’u Burundi