Indonesia: Ufatwa atambaye agapfukamunwa, acukura imva z’abishwe na Covid-19

Indonesia: Ufatwa atambaye agapfukamunwa, acukura imva z’abishwe na Covid-19
Mu gihe Isi yugarijwe n’icyorezo cya Covid-19, leta nyinshi zashyizeho amabwiriza yo kwirinda ikwirakwira ryacyo. Zashyizeho n’ibihano bitandukanye ku batayubahirije, byagera gace ka Gresik muri Indonesia, ufashwe atambaye agapfukamunwa akaba ahanishwa gucukura imva zishyingurwamo abishwe n’iki cyorezo.

Iby’iki gihano byamenyekanye tariki ya 9 Nzeri 2020. Umuyobozi w’Akarere ka Cerme agace ka Gresik gaherereyemo mu Ntara ya East Java, Suyono ubwo yari amaze gufata abaturage 8 batambaye agapfukamunwa, yahise abahanisha kujya gufasha abacukura imva mu mudugudu wa Ngabetan.

Babiri babiri batambaye agapfukamunwa, bategetswe gucukura imva imwe kugeza yuzuye.

Suyono nyuma yo gutanga iki gihano cyafashwe nk’igikakaye, yatangaje ati: “Ubusanzwe hari abantu batatu bacukuraga imva, rero natekereje ko ari byiza ko aba ngaba bajya kubafasha. Ndizera ko ibi byakanga abagerageza kutubahiriza amabwiriza.”

Indonesia imaze kubonekamo abantu barenga 316,000 banduye icyorezo cya Covid-19. Muri bo hamaze gupfa abakabakaba 11,472. Abayobozi b’inzego z’ibanze bahawe uburenganzira bwo gutanga ibihano bashaka ku batubahirije amabwiriza yo kwirinda iki cyorezo. Ibyo bihano birimo amafaranga n’imirimo y’amaboko ifitiye igihugu akamaro.

like
0
dislike
0
love
0
funny
0
angry
0
sad
0
wow
0