Iran: Minisitiri yanduye Coronavirus

Iran: Minisitiri yanduye Coronavirus

Minisitiri w’Ubuzima wungirije muri Iran, Iraj Harirchi kuri uyu wa 25 Gashyantare 2020 yatangaje ko yamaze kwandura indwara y’icyorezo ya Coronavirus.

Iyi Min. Harirchi yemeje ubu burwayi nyuma y’ikiganiro yagiranye n’abanyamakuru ku wa mbere tariki ya 24 Gashyantare mu mugi wa Tehran, agaragaraho bimwe mu bimenyetso by’iyi ndwara birimo gukorora no kubira icyuya.

Uyu minisitiri mu nkuru ya AFP, abicishije kuri televiziyo y’igihugu, yagize ati : « Nanjye nanduye Coronavirus. Mu ijoro ryashize nari mfite umuriro kandi bampimye basanga iki cyorezo cyaramfashe. »

Iran ni cyo gihugu cya kabiri gifite umubare munini w’abantu bagizweho ingaruka na Coronavirus nyuma y’Ubushinwa, aho iki cyorezo cyaturutse. Muri Iran, hamaze kwandura abantu 95 mu gihe 15 bamaze gupfa.

Mu Bushinwa, abaturage bamaze kwandura bagera ku 90,000, muri bo abantu bagera ku 2800 bamaze gupfa. Abanduye n’abamaze gupfa biganjemo abo mu ntara ya Hubei cyane cyane mu mugi wa Wuhan, aho iki cyorezo cyavumbuwe mu ntango za Mutarama 2020.