Joseline abayeho nabi kuko yatotejwe n'ababyeyi agaterwa inda kabiri zidateguwe

Joseline abayeho nabi kuko yatotejwe n'ababyeyi agaterwa inda kabiri zidateguwe

Uwurukundo Joseline wo mu Karere ka Gisagara avuga ko yatewe inda afite imyaka 16 y’amavuko, ababyeyi be baramutoteza ava mu rugo ajya kubaho mu buzima bwo kuzerera bimuviramo guterwa indi.

Uwo mukobwa w’imyaka 20 y’amavuko wo mu Kagari ka Saga mu Murenge wa Muganza; avuga ko abayeho mu buzima bubi bitewe no kubyara inda zitateganyijwe ubugira kabiri.

Avuga ko inda ya kabiri yayitewe n’umusore wo mu muryango we abereye nyinawabo.

Mu buhamya bwe agaragaza ko guterwa inda byaturutse ku gutotezwa na nyina bimuviramo kuva mu rugo aramuhunga.

Ati “Gutwara inda zitateganyijwe byatewe nuko Mama yanyanze akajya ankubita atuma nsa nuba ikirara.”

Uko yatewe inda ya mbere

Uwurukundo avuga ko byatangiye atumvikana n’ababyeyi be ashinja kumutoteza bituma yizera umusore wamubwiraga ko amukunda, birangira amuteye inda aramwihakana.

Ati “Inda ya mbere nayitwaye nsa n’utaba mu rugo kuko Mama yatantotezaga akantuka akanankubita, mva mu rugo nkajya njya kurara kwa Marume cyangwa ahandi mbonye. Najyaga no kurara ku muhungu twakundanaga bigeze aho antera inda.”

Akomeza avuga ko uwo muhungu amaze kumutera inda atongeye kumufasha biba ngombwa ko asubira iwabo.

Uko yatewe inda ya kabiri

Uwurukundo avuga ko akimara guterwa inda ya mbere yasubiye kuba iwabo, ababyeyi be bongera kumutoteza birangira yongeye kubahunga bimuviramo guterwa inda n’umusore wo mu muryango abereye nyinawabo.

Ati “Umwana namubasigiye afite umwaka n’amezi icyenda ndagenda kubera ko Mama yansererezaga njya gukora akazi ko mu rugo, byageze aho baranyirukana nsubiye mu rugo nabo baranyirukana nkajya ngenda ndara aho mbonye birangira uwo muhungu anteye inda. Uwanteye inda ni uwo mu muryango wacu; bambwira ko ndi nyinawabo.”

Uwurukundo avuga ko uwo musore abereye nyinawabo yamuteye inda amusanze mu buriri kuko yari yaraye iwabo.

Ati “Najyaga iwabo nkaharara birangira na we aje aza kuryama aho ndyamye birangira anteye inda.”

Avuga ko guterwa inda ubugira kabiri byamugizeho ingaruka mbi kuko kuri ubu abayeho mu buzima bubi akaba atabasha kubona ibyo kurya cyangwa icyo kwambara.

Ati “Nta muntu mfite unyitaho kuko kenshi na kenshi ndaburara nkanabwirirwa; iyo ntabonye aho njya gukora ikiraka ntabwo mbasha kubona icyo ndya.”

Urebye ubuzima Uwurukundo abayemo bigaragara ko bugoye kuko yaba we n’umwana ahetse ntibaheruka gukaraba. Avuga ko kubona isabune bitamworohera.

Kuri ubu afite abana babiri; umukuru afite imyaka ine n’amezi atandatu na ho umuto afite umwaka umwe n’amezi atatu.

Umwana mukuru yamusize iwabo ku babyeyi be naho umuto yirirwa amubungana bakarara aho bageze.

Uwurukundo yahuye n’Umunyamakuru wa IGIHE dukesha iyi nkuru ubwo yari agiye kuboneza urubyaro muri gahunda yateguwe n’Umuryango mpuzamahanga Action Aid wo gukumira inda zitateguwe no gufasha abangavu bazitewe kuva mu buzima bubi.

Ati “Maze kuboneza urubyaro, ndagiye ntekerereza muganga ibyanjye anshyiramo agapira k’imyaka itanu.”

Avuga ko bitewe n’ubuzima abayemo; abagabo ahuye nabo baba bifuza kumufasha ari uko babanje kuryamana na we.

Ati “Haba ubwo mbuze uko mbigenza nkabyemera kugira ngo umwana wanjye abone icyo kurya, nta kundi mba mbona nabigenza.”

Umuyobozi wungirije ushinzwe imibereho myiza y’abaturage mu Karere ka Gisagara, Gasengayire Clemance, avuga ko ibibazo by’amakimbirane yo mu ngo biri mu bituma abangavu baterwa inda imburagihe.

Yemeza ko ibyo bibazo bari guhangana na byo binyuze mu kwigisha ababyeyi no kubagira inama yo kwita ku bana babo no kubaganiriza.

Mu gufasha abangavu batewe inda imburagihe bakaba babayeho mu buzima bubi babajyana kwiga imyuga kugira ngo babashe kwibeshaho.

Ati “Ku kigo cyacu cy’imyuga cya ‘Yego Center’ mu bana b’urubyiruko bahiga, buriya harimo benshi mu bakobwa babyariye iwabo.”

Kuri ubu hari kubarurwa n’abandi bangavu batewe inda imburagihe kugira ngo harebwe uko nabo bafashwa kuva mu buzima bushaririye barimo.

Imibare igaragaza ko mu Karere ka Gisagara abangavu batewe inda imburagihe mu mezi icyenda yo muri uyu mwaka wa 2019 barenga 430.