Kanye West yashyize hanze amashusho yihagarika ku gikombe cya Grammy Awards

Kanye West yashyize hanze amashusho yihagarika ku gikombe cya Grammy Awards

Umuraperi w’Umunyamerika Kanye Omari West uzwi nka Kanye West, yashyize amashusho ku rukuta rwe rwa Twitter ari kwihagarika ku gikombe cya Grammy Awards, bitungura benshi.

Amashusho yayaherekesheje amagambo agira ati “Munyizere ntabwo nzarekera.”

Bamwe mu bazwi mu ruganda rw’umuziki muri Amerika barimo umwanditsi w’indirimbo, Diane Warren, banenze amashusho ya Kanye West ari kwihagarika ku gikombe.

Yagize ati “Si byiza kandi ntibyiyubashye.”

Yakomeje ati “Ibi wabihawe na bagenzi bawe mu rwego rwo kubaha akazi kawe, none uri kubyihagarikaho. Mfite Grammy imwe kandi ndabyishimira iteka kandi nicisha bugufi kuba bagenzi banjye barasanze mbikwiriye.”

Abandi barimo umuvandimwe wa Billie Eilish n’umuririmbyi Finneas O’Connell bo bavuze ko ‘bibabaje’.

Uyu muraperi w’imyaka 43, muri iki cyumweru nibwo yatangije intambara ku nzu zireberera inyungu abahanzi za Universal Music Group na Sony Music Entertainment.

Yavugaga ko bakwiriye kumuha uburenganzira bwuzuye ku bihangano bye, icyo gihe yanavuze ko atazongera gushyira hanze indirimbo kugeza igihe amasezerano afitanye n’izi sosiyete arangiye.

Yagize ati “Nta ndirimbo n’imwe nzashyira hanze kugeza igihe nzaba ndangizanyije amasezerano yanjye na Sony na Universal. Ku Mana, mu izina rya Yesu […]”

Arongera ati “Nkeneye kureba amasezerano ya buri muntu na Universal cyangwa Sony. Ntabwo nshaka gukomeza kubona abantu banjye baba abacakara. Uruganda rw’umuziki ndetse na NBA, ni ubwato bw’ubucakara buteye imbere bw’iyi minsi. Ndi Mose [uvugwa muri Bibiliya yambutsa Abisirayeli inyanja itukura].”

Hari naho yavuze ko sosiyete zikorana n’abahanzi zibatsikamira ari nayo mpamvu, ari bake bagira amamiliyari bayakuye mu muziki. Yitangaho urugero avuga ko amafaranga yose afite yayakuye hanze yawo.

Mu minsi ishize, umugore wa Kanye West, Kim Kardashian, yatangaje ko umugabo we yakunze kwibasirwa n’uburwayi bwo mu mutwe ndetse no muri iki gihe bukaba butamworoheye.

Kanye West mu 2018 yari yatangaje ko abana n’ubu burwayi ubwo yashyiraga hanze album ye ya munani yise ‘Ye’. N’ubwo yabyivugiye ntabwo abo mu muryango we bigeze bashaka kubyinjiramo ngo babivugire ku karubanda.

Mu minsi ishize uyu muraperi yari yatangiye ibikorwa byo kwiyamamariza kuyobora Leta Zunze Ubumwe za Amerika.

Kanye West yatunguranye yihagarika ku gihembo cya Grammy Awards