Kenya: Amabandi ari gukoresha ’drones’ ananiza abapolisi

Kenya: Amabandi ari gukoresha ’drones’ ananiza abapolisi
Muri Kenya mu mujyi wa Nakuru hari udutsiko tw’amabandi turi gukoresha utudege duto tuzwi nka ’drones’ mu rwego rwo kujijisha abashinzwe umutekano no kwangiza ingamba Leta yafashe mu kwirinda covid-19.

Ibi bikorwa biri gukorwa n’udutsiko tw’urubyiruko rw’abahezanguni turimo akitwa "Confirm" kazwi cyane mu mujyi wa Nakuru. Umukuru w’Igipolisi muri Nakuru, Erustus Mbui yagize ati: “Twamenye amakuru ko ubu noneho ako gatsiko kari gukoresha ’drones’ mu bikorwa byabo by’ubugizi bwa nabi. Abashinzwe umutekano icyo batangiye kukitaho mu buryo bweruye."

Ibi Mbui yabitangarije mu kiganiro yatanze cyateguwe n’Urugaga rwita ku burenganzira bwa muntu muri Nakuru, kigamije kurwanya udutsiko tw’ubuhezanguni mu rubyiruko. Yavuze ko ’drones’ byoroheye utu dutsiko kubona utu tudege kubera bamwe mu baherwe barushyigikiye. Harakekwa ko utu tudege turi gukoreshwa n’urubyiruko rwigometse kubera kubuzwa akazi na ’Guma mu Rugo’.

Hari bamwe mu banyapolitiki batungwa agatoki n’inzego z’umutekano zibashinja kugira uruhare muri ibi bikorwa no kubitera inkunga. Mbui ati: “Hari abanyapolitiki babi bashyigikiye iki gikorwa nk’aho bakagiriye inama uru rubyiruko bari kurutera inkunga yo gukomeza kwangiza. Abenshi muri bo barakoresha amafaranga yabo barwanya ubutabera, ndabazi vuba ndabagaragaza".

Yakomeje avuga ko nk’abagize agatsiko kitwa "Confirm" inzego z’umutekano zamaze kumenya aho bihishe n’ababahishe. Ati: "Turaza kubashyira ku mugaragaro bidatinze".

Umuturage wo mu gace ka Kivumbini avuga ko Polisi isanzwe izi aho utu dutsiko twihisha, ndetse ngo hari n’abajya bafatwa bikarangira barekuwe nta kujyanwa mu nkiko.

Mbui avuga ko batagomba gutegereza guta muri yombi aba bagizi ba nabi ngo bajyanwe mu rukiko. Ati: "Dukomeje kujya mu by’inkiko, twazisanga amazi yarenze inkombe. Umwaka ushize, umwe mu banyapolitiki yafashwe ari mu mugambi wo gutwika sitasiyo ya lisansi none ikirego kiracyari mu rukiko. Iryo se ni ikosa rya Polisi? Kutamukatira wabishinja Polisi?"

Uduce twashegeshwe n’ubugizi bwa nabi bw’aka gatsiko "Confirm" harimo Flamingo, Kimathi, Lakeview, Bondeni, Kivumbini, Manyani, Kwa Rhonda, Kaptembwa, Free Area n’akajagari ka Kaloleni.

What's Your Reaction?

like
0
dislike
0
love
0
funny
0
angry
0
sad
0
wow
0