Kirehe: Umucungamutungo w’Umurenge ukekwaho kunyereza umutungo yasanganywe miliyoni 5.1 Frw mu rugo

Kirehe: Umucungamutungo w’Umurenge ukekwaho kunyereza umutungo yasanganywe miliyoni 5.1 Frw mu rugo

Umucungamutungo w’Umurenge wa Kigarama mu Karere ka Kirehe na rwiyemezamirimo watsindiye isoko ryo kugemura ibikoresho byo kubakisha amashuri, batawe muri yombi bakekwaho kunyereza amafaranga ya leta binyuze mu kwishyuza ibikoresho biruta ibyatanzwe.

Uyu mucungamutungo yari amaze igihe gito akuwe mu Murenge wa Nyamugari, ari naho bikekwa ko yanyerereje uyu mutungo afatanyije na rwiyemezamirimo. Bombi batawe muri yombi kuri uyu wa Kane.

Umuyobozi wungirije w’Akarere ka Kirehe ushinzwe Iterambere ry’Ubukungu, Nsengiyumva Jean Damascene, yabwiye IGIHE dukesha iyi nkuru ko bombi bakekwaho ubufatanyacyaha mu kunyereza umutungo wa leta.

Yagize ati “Baje kubyumvikanaho, amusaba kumukorera ibyerekana ko yohereje ibikoresho, noneho umucungamutungo we mu kubyuzuza yujujeho ibikoresho byinshi birenze ibyageze ku nyubako. Dosiye yaje gucamo, ibikoresho birishyurwa, hishyurwamo n’ibitaraje.”

Rwiyemezamirimo ngo yafashe amafaranga yarengaga ku yo yagombaga guhabwa ayaha umucungamutungo, ari naho hava ubufatanyacyaha mu kunyereza umutungo wa leta.

Visi Meya yakomeje avuga ko ku bufatanye n’inzego z’umutekano baje gukurikirana iki kibazo, uyu mucungamutungo bakamusangana miliyoni 5 168 000 Frw iwe mu rugo. Rwiyemezamirimo kandi ngo yiyemereye ko yahaye uyu mucungamutungo miliyoni 3.5 Frw mu ntoki.

Uyu muyobozi yasabye abantu bose bafite aho bahuriye no gucunga umuntungo wa rubanda kutawangiza, kuko ushinganye.

Ati “Icyo dusaba ni uko n’abandi bose bafite inshingano zo gutanga ibikoresho n’ahandi ko umutungo wa leta ushinganye, ni umutungo w’abaturage bose, turabasaba kudatekereza kuwunyereza no kuwangiza nibareke dufatanye twubake ibyumba by’amashuri abana bacu basubire ku ishuri.”

Mu Karere ka Kirehe kuri ubu hari kubakwa ibyumba by’amashuri 692 n’ubwiherero 992, mu gihe mu cyiciro cya mbere hubatswe ibyumba bisaga 100.

Abakekwaho iki cyaha bafungiye kuri sitasiyo ya RIB ya Kirehe.