Kizito Mihigo yakomoje kuri Nsabimana ‘Sankara’ wamwinjije mu bikorwa byatumye afungwa imyaka 10

Umuhanzi Kizito Mihigo uherutse gufungurwa nyuma y’imbabazi za Perezida Kagame, yakomoje kuri Nsabimana Callixte ‘Sankara’, wamwinjije mu bikorwa byatumye akatirwa igifungo cy’imyaka 10, nyuma yo kumuhamya ibyaha birimo gucura umugambi w’ubwicanyi.

Kizito Mihigo yakomoje kuri Nsabimana ‘Sankara’ wamwinjije mu bikorwa byatumye afungwa imyaka 10

Umuhanzi Kizito Mihigo uherutse gufungurwa nyuma y’imbabazi za Perezida Kagame, yakomoje kuri Nsabimana Callixte ‘Sankara’, wamwinjije mu bikorwa byatumye akatirwa igifungo cy’imyaka 10, nyuma yo kumuhamya ibyaha birimo gucura umugambi w’ubwicanyi.

Nsabimana ‘Sankara’, kuwa Kane yagejejwe imbere y’urukiko atungura benshi ubwo yemeraga ibyaha 16 aregwa, agasaba abanyarwanda n’Umukuru w’Igihugu imbabazi ku bw’ibikorwa by’umutwe yari ayoboye byishe abaturage.

Ashinjwa ibyaha birimo; iremwa ry’umutwe w’ingabo ritemewe, icyaha cy’iterabobwoba ku nyungu za politiki, gukora no kugira uruhare mu bikorwa by’iterabwoba no gutanga amabwiriza mu gikorwa cy’iterabwoba.

Hari kandi kuba mu mutwe w’iterabwoba, icyaha cyo kugambana no gushishikariza abandi gukora iterabwoba, ubwicanyi n’ubwinjiracyaha bw’ubwicanyi, gufata bugwate, gukwiza amakuru atariyo cyangwa icengezamatwara rigamije kwangisha leta y’u Rwanda mu bihugu by’amahanga.

Harimo ndetse guhakana Jenoside, kwiba yitwaje intwaro, gutwika, kugirana umubano na leta y’amahanga hagamijwe gushoza intambara, gukora cyangwa gukoresha impapuro mpimbano, gukubita no gukomeretsa ku bushake no gutanga, kwakira no gushishikariza kwakira ibikomoka ku iterabwoba.

Mu kwisobanura Nsabimana yemeye ibyaha aregwa anabisabira imbabazi. Ati “Njye nkaba ntiteguye kuburana urwa ndanze ku byaha mfitiye ibimenyetso. Hari ibyaha byabaye ku mugaragaro, n’inyoni zo mu biti ubwabyo zabinshinja. Murakoze."

Nyuma y’iburanisha, abantu batandukanye bongeye kugaruka ku isano ya Nsabimana ’Sankara’ n’umuhanzi Kizito Mihigo, wahamijwe ibyaha birimo icyo kurema umutwe w’abagizi ba nabi, icy’ubugambanyi bwo kugirira nabi Ubutegetsi buriho cyangwa umukuru w’igihugu.

Yahamijwe kandi ubwoshye bw’ubugambanyi bwo kugirira nabi umukuru w’igihugu ndetse n’icyo gucura umugambi w’ubwicanyi ariko ahanagurwaho icyaha kimwe cyo gucura umugambi w’ibikorwa by’Iterabwoba.

Uwitwa Tuyishimire Jean de Dieu, yakoresheje Twitter yandika mu nsi y’ifoto iriho Nsabimana Callixte wiyita Sankara, ubwo yerekwaga itangazamakuru agira ati “Uyu niwe Sankara wasezeranyije Kizito Mihigo, kumugira Minisitiri w’Umuco na Siporo, igihe yaba yafashe u Rwanda?! Ariko uru Rwanda bafata ye!”.

Kizito Mihigo yahise amusubiza mu cyo yise ‘itandukaniro riri hagati yanjye na we [Sankara]’.

Ati “Icya mbere, aremera ibyo aregwa bishingiye ku bikorwa by’ubugizi bwa nabi mu gihe njye nemeye ibyo ndegwa bishingiye ku kiganiro nagiranye na we kuri WhatsApp”.

“Icya kabiri, kuva mu bwana bwanjye naharaniye amahoro n’ubwiyunge bw’abanyarwanda. [Sankara] yahisemo intambara. Ndashimira Perezida wa Repubulika wampaye imbabazi”.

Bimwe mu biganiro bya Kizito Mihigo na Nsabimana ‘Sankara’

Nsabimana ‘Sankara’, yagarutse cyane muri dosiye ya Kizito Mihigo, aho uyu muhanzi asobanura impamvu yari ashyigikiye umugambi wo guhirika guverinoma y’u Rwanda no kwica Umukuru w’Igihugu.

Kuwa 10 Werurwe 2014, Kizito yabwiye (mu butumwa bugufi) Sankara ati “Ariko rero mon ami (nshuti yanjye), jyewe numva rwose mubonye uburyo mukuraho Rwabujindiri hatabaye intambara, byaba byiza kurushaho.”

Nsabimana nawe amusubiza mu magambo y’Icyongereza agira ati: “At this point, war is inevitable because he cannot agree to negotiations.”

Mu Kinyarwanda bishatse kuvuga ngo: “Kuri uru rwego, intambara niyo yonyine ishoboka kuko adashobora kwemera ibiganiro.”

Mu biganiro na Sankara, Kizito Mihigo yongeye kohereza ubundi butumwa bugira buti: “Isn’t there a way to force him? Or why don’t we kill him (Kagame) only?”

Bishatse kuvuga ngo “Ntanzira yindi ishoboka yo kumuhata? Cyangwa kubera iki tutamwica wenyine?”

Sankara yaramushubije ati: “Tugomba kwitegura gukoresha imbaraga, tugafata Intara imwe byihuse tukereka ibihugu byo hanze, hanyuma bakaza hagati yacu bagategeka ko habaho ibiganiro.”

Kizito yarashubije ati “Numva aricyo Imana yandemeye.”

Umugambi wa Kizito waje kwemezwa na Sankara binyuze mu biganiro tariki 11 Werurwe 2014.

Sankara yagize ati: “Igihugu cyawe kigutezeho kugicungura urubyiruko rw’Abahutu n’Abatutsi rukeneye ko uhagarara hagati kugira ngo ejo hazaza ibara ritazongera kugwa.”

Kizito yaramusubije ati “Numva aricyo Imana yandemeye.”

Ibindi ku kiganiro cya Kizito Mihigo na Sankara wabisanga AHA

Kizito Mihigo avuga ko ibyo Nsabimana 'Sankara' yemera bishingiye ku bikorwa byakozwe naho we ibyo yemeye ari ibiganiro bagiranye

Nsabimana 'Sankara' (ibumoso) n'umwunganizi we bari mu rukiko