Koreya ya Ruguru yamuritse missile nshya bivugwa ko ari yo nini ku Isi

Koreya ya Ruguru yamuritse missile nshya bivugwa ko ari yo nini ku Isi

Kuri uyu wa 10 Ukwakira ubwo hizihizwaga isabukuru y’imyaka 75 Ishyaka ry’Abakozi (Workers’ Party) muri Koreya ya Ruguru rimaze, mu karasisi ka gisirikare hamuritswe missile abasesenguzi bavuga ko ari imwe mu nini ku isi zishobora kurasa aho ari ho hose.

Ni mu birori byabereye mu Murwa Mukuru Pyongyang binyura ako kanya kuri Televiziyo y’icyo gihugu byamaze amasaha agera kuri abiri. Ubwo herekanwaga ubushobozi bw’igisirikare cyaKoreya ya Ruguru mu karasisi, nibwo iyi missile na yo yerekanywe itwawe n’imodoka nini cyane.

Abasesenguzi bavuga ko iyi missile bitazwi niba yarigeze igeragezwa, gusa ngo ifite ubushobozi buhambaye kuko ishobora gushyirwaho ibisasu birenze kimwe bikohererezwa rimwe mu bice bitandukanye.

Ngo ifitanye isano n’iyo iki gihugu cyagerageje mu 2017 yitwa Hwasong-15, gusa iyi yo ngo ni nini kuyirusha ndetse ifite n’ubushobozi buhambaye, nta yindi ihwanye na yo mu zo Koreya ya Ruguru yaritunze zose.

Perezida w’iki gihugu, Kim Jong Un, muri uyu muhango yavuze ko igisirakare kibereyeho kurinda abaturage ndetse n’ubusugire bw’igihugu, gusa ko uwashaka kubavogera yitwaje imbaraga za gisirikare ngo ntibamworohera.

Ati “Tuzakomeza gukaza ubwirinzi nk’uburyo bwo kwirwanaho. Ubwirinzi bwacu ntabwo buzigera bukoreshwa nabi cyangwa bihubukiwe, ibi bizagira uruhare mu kurinda ubusugire n’ubudahangarwa bw’igihugu cyacu binatume mu karere amahoro ahinda.”

Yongeyeho ati “Gusa nihagira uvogera umutuzo w’igihugu cyangwa akadukangisha imbaraga z’igisirikare, njyewe ubwanjye nta kindi nitayeho nzasaba ko hakoreshwa intwaro zacu zikomeye mu kumuhana.”

Muri ibyo birori byamaze amasaha abiri kandi, igisirikare cya Koreya ya Ruguru cyanerekanyemo izindi ntwaro zacyo zitandukanye, kinakora imyiyereko inyuranye, irimo iy’indege.

Uretse ibyo kandi Kim yanaboneyeho gushimira abaturage bose b’icyo gihugu n’abakozi bo mu nzego z’ubuzima ubudasa bagaragaje mu gukumira icyorezo cyugarije Isi yose kimaze guhitana abarenga miliyoni imwe, kuko kugeza ubu ngo nta murwayi n’umwe wigeze agaragarwaho na Coronavirus muri iki gihugu.

Mu ijambo yavuze ryuje amarangamutima ubona n’amarira yenda gushoka, Kim yagize ati “Ndabashimira ku bw’ubuzima bwa bo bwiza, no kuba nta n’umwe wagezweho n’iyi virus mbi cyane.”

“Kuba twarabashije kurinda abantu bacu bose iki cyorezo gikaze kimereye nabi isi yose, birerekana kuzuza inshingano n’intsinzi ku ishyaka ryacu.”

Yakomeje kandi asezeranya abaturage b’igihugu cye gukomeza kubarinda n’imbaraga ze zose.

Ati “Ndongera kurahira nkomeje ko nzaberaho icyizere cy’abaturage ntabatengushye, n’ubwo umubiri wanjye wazahinduka ubushwangi cyangwa ugacikamo ibice ndi mu rugamba rwo kurwana ku cyizere cyabo.”

Muri iyi myiyereko herekanywe kandi ubundi bwoko butandukanye bw'ibisasu

Kim yasezeranyije abaturage be kuzabarinda kugeza ku mwuka we wa nyuma