Koreya ya Ruguru yasubukuye ibikorwa byo kugerageza intwaro kirimbuzi

Koreya ya Ruguru yasubukuye ibikorwa byo kugerageza intwaro kirimbuzi

Leta ya Koreya ya Ruguru yatangaje ko yasubukuye igerageza ry’ibisasu kirimbuzi, mu rwego rwo gukomeza umugambi wayo wo kubaka ubushobozi bw’ibisasu kirimbuzi ivuga ko bigamije kuzafasha icyo gihugu kwirwanaho mu gihe cyaba gitewe na Leta Zunze Ubumwe za Amerika cyangwa Koreya y’Epfo, dore ko itajya imbizi n’ibi bihugu byombi.

Televiziyo y’Igihugu (KCNA) yatangaje ko igisasu cyageragejwe cyarashwe kikagera mu birometero 1.500, ndetse ngo iri gerageza ryamaze iminota 126, ryagenze neza.

Amakuru avuga ko iyi ntwaro nshya yamuritswe na Koreya ya Ruguru iri mu mugambi wa Kim Jong Un wo kurushaho gukarishya ubushobozi bw’icyo gihugu mu bijyanye no gukora intwaro kirimbuzi, zifatwa nk’uburyo bwo kurinda umutekano w’icyo gihugu.

Mu 2019, nyuma y’uko icyo gihugu cyari kimaze iminsi gikoze igerageza ku ntwaro kirimbuzi zishobora kuraswa muri Leta Zunze Ubumwe za Amerika, cyasubitse amagerageza y’intwaro kirimbuzi, kugira ngo atabangamira ibiganiro byarimo guhuza nyuma Perezida Donald Trump na Jong Un, ku buryo burambye bwo gucyemura iki kibazo.

Ibyo biganiro ntibyageze ku ntego zabyo, kuko Koreya ya Ruguru yashinje Amerika kuyisaba guhagarika igerageza ry’intwaro zayo, ariko ntiyikurireho ibihano by’ubukungu yayifatiye.

Muri Werurwe umwaka ushize, Koreya ya Ruguru yongeye gusubukura ibikorwa byo kugerageza intwaro zayo, ariko iza kongera kumara igihe kinini itabikora nyuma y’uko icyo gihugu cyahuye n’ibibazo birimo icyorezo cya Covid-19, imyuzure yangije umusaruro w’ubuhinzi, byose bikagira uruhare runini mu kuzamura ubukene muri icyo gihugu.

Jong Un yari aherutse gusaba abahanga bakora muri porogaramu y’ikorwa ry’ibisasu bya kirimbuzi, gushyira imbaraga mu gukora ibisasu byinshi bishobora kugera muri Amerika, gukora amato agendera munsi y’inyanja ashobora kurasa ibisasu bya kirimbuzi, gukora satellite zifashishwa mu butasi n’ibindi bikorwa by’ikoranabuhanga bifitanye isano n’ibyo.