Koreya ya Ruguru yise ‘igicucu’ Minisitiri w’Intebe w’u Buyapani kandi giciriiritse muri politike

Koreya ya Ruguru yise ‘igicucu’ Minisitiri w’Intebe w’u Buyapani kandi giciriiritse muri politike

Koreya ya Ruguru yise Minisitiri w’Intebe w’u Buyapani, Shinzo Abe ‘igicucu n’igikuri muri politiki’ , inamuburira ko nareba nabi azabona neza igisobanuro nyacyo cy’ibisasu kirimbuzi vuba aha.

Itangazo rya Leta ya Koreya ya Ruguru rituka rikanaburira u Buyapani, rije nyuma y’uko kuwa Kane icyo gihugu cyagerageje ibisasu kirimbuzi bibiri bito byajugunywe mu Nyanja.

Iryo gerageza ryakangaranyije u Buyapani, Minisitiri w’Intebe Abe, ahita atumiza inama y’umutekano igitaraganya, bemeza ko ibyo Koreya ya Ruguru yakoze bibangamiye cyane umutekano w’isi.

Koreya ya Ruguru yahise isubizanya uburakari, maze umuyobozi umwe wo muri Minisiteri y’Ububanyi n’Amahanga avuga ko Abe ibyo yavuze bigaragaza ko ntacyo azi ku by’igisirikare.

Ibiro Ntaramakuru bya Koreya, KCNA, byanditse ko uwo muyobozi yagize ati “Abe niwe gicucu cya mbere ku Isi akaba ikigoryi cya mbere isi yagize kuko atazi gutandukanya ibisasu kirimbuzi n’ibindi bisasu bisanzwe.”

Yakomeje agira ati “Imyitwarire ya Abe yatumye tumubona nk’imbwa yamazwe n’ubwoba cyangwa se ikibwana cy’imbwa cyihisha inyuma ya shebuja nka Amerika.”

Uwo muyobozi yongeyeho ko Abe ari umuntu ufite imitekerereze iciriritse mu bya politiki utagize icyo amaze ku Isi.

Mu gusoza, uwo muyobozi yavuze ko Abe “ashobora kubona icyo igisasu kirimbuzi cya nyacyo bisobanuye mu minsi mike”.

Ntabwo biramenyekana niba uwo muyobozi yashakaga gusobanura ko bazarasa igisasu kirimbuzi mu Buyapani.

Igisasu Koreya yagerageje kuwa Kane kibaye icya 13 icyo gihugu kigerageje kyva muri Gicurasi uyu mwaka.

Koreya ya Ruguru iri mu bihano bya Loni biyibuza gukora no kugerageza ibisasu kirimbuzi ariko ihora ibirengaho. Mu 2017 nabwo icyo gihugu cyarashe ibisasu bibiri bya kirimbuzi hejuru y’u Buyapani.

Iri gerageza rije rikurikira izamba ry’ibiganiro hagati ya Koreya ya Ruguru na Leta Zunze Ubumwe za Amerika, ryari rigamije kubuza icyo gihugu gukomeza gukora ibisasu kirimbuzi kigakurirwaho ibihano mpuzamahanga cyafatiwe