Mashami Vincent yagaye bamwe mu bakinnyi b’Amavubi babyibushye

Mashami Vincent yagaye bamwe mu bakinnyi b’Amavubi babyibushye

Umutoza w’ikipe y’igihugu y’u Rwanda, Mashami Vincent avuga ko urwego yasanzeho abakinnyi atari rubi gusa ashimingira ko hari abo yasanze barakoze bameze nk’abadafite intego kuko biyongereye ibiro byinshi cyane.

Ku wa Gatanu w’icyumweru gishize ni bwo ikipe y’igihugu yatangiye umwiherero yitegura umukino wa Cape Verde mu gushaka itike y’igikombe cy’Afurika cya 2022 uzaba mu kwezi gutaha.

Mu bakinnyi 37 yari yahamagaye ntabwo bose bahise bitabira kuko abakina haze y’u Rwanda bagera 10 bataraza ndetse n’abandi 11 ba APR FC bari mu mwiherero n’ikipe yabo umutoza ntiyahise abarekura.

Umutoza akaba yaratangiranye umwiherero n’abandi bakinnyi bose basigaye hiyongeraho n’abari ku rutonde rwo gutegereza(waiting list).

Nyuma y’igihe gito bamaze bakora imyitozo, umutoza yavuze ko muri rusange abakinnyi yasanze urwego bariho atari rubi.

Ati“Ngira ngo rero icyo dukomeza gukora ni ugukoresha aba basore, ariko ikigaragara ni uko batameze nabi cyane, bari bamaze igihe bakora ku giti cyabo, badakora nk’ikipe. Bakoraga ibintu bidafite igihe bitangirira n’igihe biri burangirire, urabona ko hari abiyongereye ibilo, harimo abataragaruka neza, tumaze iminsi ibiri dukora ibijyanye no kongera imbaraga.”

Yakomeje avuga ko ariko hari abakinnyi biyongereye ibiro cyane muri ibi bihe bya COVID-19, bameze nk’abakoraga imyitozo nta ntego bafite.

Yagize ati“bagerageje kwirwanaho n’ubwo twari mu bihe bitoroshye, urabona ko hari abakomeje gukora bafite gahunda, ariko hari n’abakoze ubona ko nta ntego bari bafite. Ntabwo ari uguhera kuri zero, turahera ku byo bafite, tugire ibyo tubongerera kugira ngo basubire mu bihe bahozemo.”

Umukino w’u Rwanda na Cape Verde uteganyijwe tariki ya 13 Ugushyingo 2020 muri Cape Verde, mu gihe uwo kwishyura uzaba tariki ya 17 Ugushyingo mu Rwanda.