Mashami yubashye APR FC yanga guhamagara Sugira wamujyanye muri CHAN

Mashami yubashye APR FC yanga guhamagara Sugira wamujyanye muri CHAN

Umutoza mukuru w’ikipe y’igihugu y’u Rwanda ‘Amavubi’, Mashami Vincent, yavuze ko kuba atarahamagaye rutahizamu Sugira Ernest mu ikipe igomba kwitegura imikino u Rwanda ruzahuramo na Mozambique na Cameroun, ari uko yubashye ikipe akinira ya APR FC.

Mashami yabitangarije mu kiganiro n’abanyamakuru cyabaye kuri uyu wa Gatatu, ubwo yatangazaga abakinnyi 27 bagomba kwitabira umwiherero w’iyi mikino yombi izaba tariki ya 14 na 17 Ugushyingo mu gushaka itike yo kujya mu Gikombe cya Afurika cya 2021 kizabera muri Cameroun.

Ati” Ndibwirinde kukivugaho ibintu byinshi, kuba ntamuhamagaye ni byo, gusa hari impamvu twese tuzi, uretse kuba yarahagaritswe n’ikipe ye, ashobora kuba atahamagarwa mu buryo bumwe cyangwa ubundi. Ikipe y’igihugu nta mukinnyi igira.”

“Amakipe ni bo bakoresha ba mbere b’abakinnyi twitabaza, tubanza no gusaba uburenganzira mu makipe yabo. Twakabaye tumufite, yaradufashije ni byo ariko twe twubashye ibyemezo by’umukoresha we wa mbere, APR FC, ni we bafitanye amasezerano.”

Sugira Ernest aherutse guhagarikwa n’ikipe ye ya APR FC nyuma y’amagambo yatangaje ubwo yari amaze gufasha u Rwanda kubona itike ya CHAN 2020, akavuga ko yisanga cyane mu ikipe y’igihugu.

Ikipe y’ingabo yamuhagaritse amezi abiri, imukata 30% by’umushahara muri iki gihe cy’ibihano ndetse yohererezwa mu ikipe y’abato ‘INTARE FA’ ngo ari ho ajya gukorera imyitozo.

Mashami avuga ko yizeye ko uyu mukinnyi azagaruka vuba ndetse APR FC izaca inkoni izamba, ibihano yahaye uyu mukinnyi bikagabanywa.

Ati” Ntabwo twarenga ku cyemezo yafatiwe n’umukoresha we wa mbere kuko birashoboka ko hari ibyo basinyanye twe dushobora kuba tutazi. Sugira arabyemera ko yakoze ikosa ndetse yateye intambwe asaba imbabazi mu buryo bwanditse, avuga ko yahubutse.

Turizera ko APR FC izaca inkoni izamba. Guhana ni byo ariko iyo umuntu yasabye imbabazi ngira ngo nta kabuza, simbavugira ariko ndizera ko imbabazi bazazimuha bidatinze.”

Umutoza w’ikipe y’igihugu yagiriye inama Sugira n’abandi bakinnyi, abasaba kwitondera amagambo no kwirinda itangazamakuru kuko akenshi ribateza ibibazo.

Ati” Inama namugira hamwe n’abandi ni ukwitondera amagambo, ni ukwitondera itangazamakuru kuko rimwe na rimwe muduteza ibibazo, ni mwe mubateza ibibazo kuko ndakeka biriya yavuze iyo umuntu aza kubimubaza nyuma y’iminota 30 yamaze koga, ndakeka yari kuvuga ibindi bitandukanye.”

Muri iki kiganiro n’abanyamakuru, Mashami yavuze ko kandi impamvu yongeye guhamagara Niyonzima Ally ari uko basanze ikibazo cy’imyirondoro mu mazina ye ntacyo gitwaye mu gihe ngo yizeye urwego rwa Bizimana Djihad wari umaze iminsi adakina mu ikipe ye ya Waasland Beveren mu Bubiligi.