Menya igisobanuro cy’ibuye rinini ryashyizwe imbere y’ibiro by’ Akarere ka Kamonyi

Menya igisobanuro cy’ibuye rinini ryashyizwe imbere y’ibiro by’ Akarere ka Kamonyi

Imbere y’ ibiro by’akarere ka Kamonyi, inyuma y’uruzitiro mu busitani hari ibuye rinini ryahashyizwe ryanditseho icyivugo cy’akarere, ‘Abesamihigo ba Kamonyi, iterambere rirambye’. Meya Kayitesi avuga ko iri buye ari ikirango cy’akarere.

Iri buye ntabwo ryanditseho impamvu yatumye rishyirwa ku karere ariyo mpamvu bamwe mu baribona badahita basobanukirwa impamvu riri ku karere.

Umuyobozi w’ Akarere ka Kamonyi Kayitesi Alice, aherutse kubwira abanyamakuru ko iri buye impamvu ryashyizwe ku karere ari uko ari akarere kamaze gusobanukirwa ko urutare ari ikintu gifite akamaro.

Yagize ati “Ririya buye rinini riri ku karere niyo brand yacu nk’akarere. Akarere ka Kamonyi gafite umutungo kamere w’amabuye, dufite n’uruganda rutunganya ayo mabuye ndetse na site zacu ziri iruhande rwacu ku karere, hari amabuye ya granites atunganywamo ibikoresho bitandukanye nabyo bigakorera mu karere kacu.”

Akomeza agira ati “Nubwo wavuze ngo nta nyandiko iriho, ariko twahisemo gushyiraho icyivugo cyacu nk’akarere, ‘Abesamihigo ba Kamonyi, iterambere rirambye’, nka brand yacu ku buryo umuntu wese uzinjira muri Kamonyi, azabona uwo mutungo kamere wacu kandi akabona ko udufitiye akamaro. Ubundi urutare bijya bigaragara nk’aho ari ikintu kiri aho cyabuze icyo kimara, kibangamiye abaturage ariko twe twageze ku ntambwe yo kurubyaza umusaruro”.

Uretse aya mabuye kandi mu karere ka Kamonyi ni hamwe mu hagaragara amabuye y’agaciro n’ibigo by’ubucuruzi biyacukura ku buryo byahaye akazi umubare utari muto w’abaturage.

Muri aka karere hari kubakwa uruganda rw’ikigage, kizajya gifungwa mu macupa. Iki kigage kizajya cyengwa mu bigori no mu masaka. Biteganyijwe ko uyu ruganda ruzatangira imirimo yarwo muri uyu mwaka wa 2020.


Ibiro by’akarere ka Kamonyi


Meya wa Kamonyi, Kayitesi Alice