Meya Kayumba yabwiye abacuruzi b’umujyi wa Rusizi ko uzarasirwa muri magendu azihangane

Meya Kayumba yabwiye abacuruzi b’umujyi wa Rusizi ko uzarasirwa muri magendu azihangane
Mu gihe abaturage benshi b’Akarere ka Rusizi bavuga ko akaga barimo ko kutabasha gutarabukira mu tundi turere n’umujyi wa Kigali kubera COVID-19 bagatewe na bamwe muri bo, na bamwe mu bacuruzi bo mu mirenge ihana imbibe na RDC y’umujyi wa Rusizi n’inkengero zawo kubera magendu, umuyobozi w’aka karere Kayumba Ephrem, mu biganiro yagiranye n’abacuruzi b’umujyi wa Rusizi, yaberuriye ko ibihano by’abafatirwa muri magendu byakajijwe cyane birimo no kuraswa, uwo bizabaho, we, abamutuma n’umuryango we bakazihangana.

Muri ibi biganiro byabaye ku wa 28 Nyakanga, Meya Kayumba Ephrem yababwiye ko ingaruka z’iki cyorezo ari nyinshi cyane ku buzima n’ubukungu bw’abaturage b’aka karere, aho kuva ku wa 20 Werurwe kugeza ku wa 30 Kamena, Akarere kamaze guhomba miliyoni zirenga 627 yagombaga guturuka mu misoro kuko imyinshi itangwa na bo , hakaba n’abacuruzi ku giti cyabo bashobora gushyirwa ku karubanda vuba aha n’amabanki kubera imyenda bagiye bayafatamo kuyishyura bikabananira kuko batakoraga, imirimo myinshi yahagaze irimo n’uburobyi bwatungaga ababukora n’abacuruzi b’ibikomoka ku mafi, n’ibindi byinshi byahungabanye.

Avuga aho ubwandu buhagaze yagize ati’’ Kugeza kuri uyu wa 28 mu karere hafi abantu 560 barayanduye, abamaze kuyikira barenga gato 340, abandi bose baracyarwaye kandi mu by’ukuri ntitwishimiye kugira umubare ungana gutya w’abantu bose barwaye biturutse ku gukinisha iki cyorezo, kuko igihe twarangara na guma mu rugo yagaruka.’’

Meya Kayumba Ephrem yanavuze ko hari amafaranga menshi agenda mu bikorwa byo kuvura iyi ndwara cyangwa kwita ku bayanduye muri aka karere, aho kugeza ku wa 25 Nyakanga Akarere kari kamaze gukoresha agera kuri miliyoni 892, aya ngo yagombaga gukoreshwa mu yindi mishinga iyo ubukana bw’iki cyorezo butahagira imbaraga nyinshi, hakaba ngo hari imihanda yadindiye yagombey kuba yaruzuye haratangiwe n’indi, mu bituma iki cyorezo kidashira muri aka karere hakabamo n’abagikora ubucuruzi bwa magendu, bakura ibintu I Bukavu muri Kongo rwihishwa.

Kuri iyi ngingo, Meya Kayumba yagize ati’’ Forode( magendu) yo ndabivuga neruye, uwo bazarasa rwose azihangane ,tuzamuherekeza turi bakeya, kuko biragaragara aho umuntu ajya ku isoko akagura salisa kuri 300 agakoroboyi kamwe ahandi ari 250 kandi mwitwa ko isoko ari rimwe. Turabona imyenda n’inkweto bya magendu hano n’ibindi. Turabizi ko mwe ubwanyu mutajyayo ariko abo mutuma barabashyira mu kaga namwe ntibazabasiga.’’

Yarakomeje ati’’ Ejobundi twafashe abari banyuze mu bice bya Nkombo , tumaze iminsi tubafata uretse iri joro tutabafashe, ariko birumvikana ko niba hakiri imyitwarire nk’iyo bifite ingaruka kuri twese kuko nitubona abakijya muri forode n’iyo mipaka ntizafungurwa, ikivu ntikizafungurwa ngo uburobyi bukore kuko na cyo ari inzira yoroshye y’iyo forode, hari abajijisha ngo barajya kuroba bagahura n’abakongomani bazanye utuntu mu mazi,iyo myitwarire yose ntituzemera ko ikomeza kugira ingaruka no kubatayigizemo uruhare.’’

Abivuze mu gihe hari benshi bashinja ubuyobozi bw’aka karere uburangare bwatumye iyi magendu ikomeza muri iki gihe cya COVID-19 abayigiyemo bagakururira akarere kose icyo cyorezo cyatumye baguma mu rugo mu gihe abandi bari barakomorewe n’ubu ingaruka z’iyi myitwarire zikaba zikizonga abaturage bose, n’ubu hari abakiyifatirwamo n’abaca mu rihumye ubuyobozi kandi bashobora kuba banakurayo iki cyorezo banduza abandi, bamwe mu bacuruzi bagasanga hakwiye izindi ngamba zikaze,zirimo no gufunga umupaka uhuza RDC n’aka karere ntihagire n’igicuruzwa cyongera gusohoka mu gihugu cyinjira mu kindi kihanyuze kugeza igihe iki cyorezo kizahagararira.

Ngiruwonsanga Théoneste, umwe muri bo ati’’ Izi ngorane zose dufite turazikomora muri aba bturanyi kandi nibikomeza gutya gusohoka aka karere ntibishoboka kuko tuzaba tujya kwanduza abandi. Ndumva hafatwa ibyemezo byisumbuyeho, byaba ngombwa hakanafungwa tukerekeza I Kigali,kuko gukomeza guhererekanya ibicuruzwa n’amafaranga, n’izo magendu tuzakomeza kuzahara.’’

Gufunga imipaka Meya Kayumba Ephrem avuga ko bitari mu nshingano z’Akarere, hari izindi nzego bireba binagira inzira bicamo, agasaba abacuruzi gukora ibyo basabwa byo kubahiriza ingamba zo kwirinda, kureka magendu no gukangurira ababagana kwirinda.

What's Your Reaction?

like
0
dislike
0
love
0
funny
0
angry
0
sad
0
wow
0