Mfitiye impuhwe abibwira ko batsinda Museveni- Gen. Muhoozi

Mfitiye impuhwe abibwira ko batsinda Museveni- Gen. Muhoozi

Lt. Gen. Muhoozi Kainerugaba, umujyanama wihariye akaba n’imfura ya Perezida Yoweri Kaguta Museveni wa Uganda, yatangaje ko afitiye impuhwe abumva ko bazatsinde Se afata Nk’umuntu wa mbere muri Afurika waharaniye impinduramatwara.

Yabitangaje kuri uyu wa gatatu itariki 25 Werurwe, mu butumwa yanyujije ku rubuga rwe rwa Twitter. Ni ubutumwa bwari buherekeje ifoto ya Se yo mu myaka ya za 80, igihe we n’ingabo yari ayoboye zari ku rugamba rwo kuvana Uganda mu nzara za Milton Obote.

Gen. Muhoozi avuga kuri se yagize ati " Jenerali Yoweri Museveni, uhiga abandi mu guharanira impinduramatwara mu mateka ya Afurika. Mfitiye impuhwe abibwira ko bashobora kumutsinda."

Imvugo ya Muhoozi hari byinshi ihishe

Kuva uyu mwaka wa 2020 watangira, Gen. Muhoozi Kainerugaba yakunze gukoresha urubuga rwa Twitter cyane, akagira ubutumwa bukomeye atambutsa, n’ubwo akenshi na kenshi buba bujimije bigatuma bamwe babufata nk’amashyengo.

Ni ubutumwa akenshi bushimagiza abo kuri we afata nk’intwari, harimo na Se umubyara, Yoweri Kaguta Museveni na Se wabo, Gen. Caleb Akandwanaho uzwi nka Salem Saleh.

Mu butumwa kandi uyu mujyanama wa Perezida wa Uganda yagiye atambutsa, hari aho bwatumaga hashyirwa mu bikorwa ibyemezo bikomeye, ibishimangira ko nta mikino cyangwa gushyenga kuba kuri mu byo avuga.

Ni mu gihe binazwi ko gushyenga bikunda kubaho gake ku basirikare.

Urugero nko ku wa 09 Werurwe yanenze uburyo Polisi ya Uganda yarebereye umuhanzi Bebe Cool aterwa amacupa, nyuma y’amasaha make Polisi ita muri yombi abari babigizemo uruhare, ababikurikiranira hafi bakemeza ko byakozwe ku itegeko rye.

Muhoozi kandi aherutse kunenga imikorere y’ikinyamakuru New Vision cya Leta ya Uganda, ibintu bitakorwa n’uwo ari we wese muri kiriya gihugu.

Abwirwa benshi akumvwa na beneyo

N’ubwo imvugo ya Gen. Muhoozi isa n’ijimije, buri wese ukurikirana Politiki yo muri Uganda yamenya abo Muhoozi yabwiraga ko afitiye impuhwe.

Ku isonga haza Depite Robert Ssentamu Kyagulanyi uzwi nka Bobi Wine, umaze igihe atangiye urugamba avuga ko rumuganisha guhirika ku butegetsi Yoweri Museveni wabugiyeho mu 1986.

Bobi Wine uyoboye abazwi nka "People Power" gahuriwemo n’abatajya imbizi n’ubutegetsi bwa NRM, akunze kumvikana yita Museveni "umunyagitugu" ndetse n’umwicanyi, ikaba impamvu yatumye ahagurukira kumurwanya yivuye inyuma.

Undi Gen. Muhoozi yasaga n’aho akomozaho, ni Col. Dr Kiiza Besigye. Uyu wahoze ari umutoni wa Perezida Museveni mbere y’uko bashwana, amaze igihe kirekire ahanganye na we, gusa incuro zose bagiye bahurira mu matora Museveni yagiye amutsinda.

Besigye n’Ishyaka rye rya FDC baracyafite ikizere cyo kuzakabya inzozi zabo, n’ubwo Muhoozi yabakaruriye inzira ku murima ko bitakunda.

Hari kandi (Rtd) Lt. Gen Henry Tumukunde, na we uherutse kwerura ku mugaragaro ko yinjiye mu barwanya Museveni. Uyu mugabo uri mu bacuruzi bakomeye muri Uganda, aherutse gutangaza ko azahatana na Museveni mu matora y’umukuru w’igihugu ateganyijwe mu mwaka utaha wa 2021.

Magingo aya ari muri Gereza ya Gulu, nyuma yo gutabwa muri yombi n’inzego z’umutekano ashinjwa ubugambanyi.

Muhoozi kandi yabwiye Gen. Mugisha Muntu n’abandi batandukanye batavuga rumwe n’ubutegetsi bwa se.

Umusimbura wa Museveni ngo arazwi

Kuba Perezida wa Uganda Yoweri Kaguta Museveni azamura mu ntera umuhungu we umunsi ku wundi mu ngabo za Uganda, akanakubitiraho kumwiyegereza amugira umujyanama we, abenshi babifata nko kumucira inzira yo kumusimbura mu gihe uriya mukambwe azaba atagifite ingufu zo kuyobora Uganda.

Bivugwa kandi ko bizwi n’igisirikare cya Uganda UPDF ko Muhoozi ari we musimbura wa Se, bityo iki gisirikare kikaba nta wundi gishobora kwemerera kuyobora Uganda.

Birasa n’aho byatangiye kwigaragaza, kuko amagambo ya Muhoozi asigaye yuzuyemo igitsure.

Mu minsi ishize ubwo hizihizwaga imyaka itatu ishize Andrew Kaweesi wahoze ari umuyobozi wungirije wa Polisi ya Uganda yishwe, Muhoozi yavuze ko bazamuhorera hatitaye ku gihe bizafata, ngo kuko UPDF na UPF bitajya byibagirwa ababigabyeho igitero.

Usibye kuba Museveni avugwaho kuraga imfura ye Uganda, binavugwa ko uyu mukambwe w’imyaka 76 y’amavuko ari no mu nzira zo kuraga Polisi ya Uganda, Steven Muzeyi Sabiiti (bivugwa ko ari umuhungu wa Museveni), akamusimbuza Martin Okoth Ochola uri kugana mu zabukuru.