MIGEPROF ivuga ko yahagurukiye iby’abakobwa b’i Rusizi bagura abasore

MIGEPROF ivuga ko yahagurukiye iby’abakobwa b’i Rusizi bagura abasore
Ifoto/Internet)
Minisiteri y’Uburinganire n’Iterambere ry’umuryango ( MIGEPROF) iratangaza ko yahagurukiye umuco wadutse mu bice by’akarere ka Rusizi aho abasore basaba abakobwa amafaranga ngo bakunde babagire abagore.

Mu Ukwakira 2018 ni bwo TV na Radio One byamenye ko hari umusore ubuyobozi bw’umurenge wa Nkungu bwanze gusezeranya kubera ko hari umukobwa wamushinjaga ko n’ubwo agiye gusezerana n’undi na we bari bafitanye gahunda yo kubana,

Icyo gihe uwo mukobwa yavugaga ko yahaye uwo musore amafaranga Ibihumbi magana abiri (200,000Frw) nk’ikiguzi gisanzwe gihabwa umusore muri aka gace ngo akunde amugire umugore nyamara ngo uyu musore yaje kubona undi warengejeho amuha ibihumbi magana atanu (500,000 Frw) aba ari we ahitamo gusezerana na we ari na bwo byaje guteza imvururu.

Uyu ni umuco ababyeyi bamwe bagaragaza ko ubabangamiye kuko utuma nta terambere bakigezaho cyane abafite abana b’abakobwa bageze igihe cyo gushaka icyo gihe basabaga ko hakorwa ubukangurambaga bwo kubyamagana.

Hashingiwe kuri iyi nkuru Minisiteri y’uburinganire n’iterambere ry’umuryango kuri uyu wa kane tariki ya 19 Ugushyingo 2020 yaganirije abatuye muri uyu murenge kuri iki kibazo kibangamiye umuryango,maze umunyamabanga uhoraho muri iyi Minisiteri, Ingabire Assumpta avuga ko baganiriye n’abaturage ndetse banzura ko uyu muco ugomba gucika burundu ndetse ko kuri ubu bitakimeze nkuko byari bimeze mbere.

Ku rundi ruhande ariko abayobozi b’inzego z’ibanze barimo abayobora amasibo n’imidugudu bitabiriye iyo nama bo bavuga ko uyu muco aho gucika ahubwo wakajije umurego,nk’’uko binashimangirwa n’umuyobozi w’akarere ka Rusizi wungirije ushinzwe imibereho y’abaturage wongeyeho ko binakurura amakimbirane yo mu miryango itandukanye yo muri ako gace.

Iki kibazo cy’abakobwa bahonga abasore amafaranga ngo bakunde babagire abagore si umwihariko wa Rusizi gusa no mu karere ka Nyamasheke birahavugwa.

Ikinyuranyo kiri hagati y’umubare w’abakobwa n’abahungu kiri mu bituma bamwe mu bakobwa bagumirwa bagahitamo kugura abagabo dore ko n’ubusanzwe itegeko nshinga rya Repubulika y’u Rwanda rivuga ko umugabo agomba gusezerana n’umugore umwe.

Imibare y’ikigo cy’ibarurishamibare mu Rwanda kuri ubu igaragaza ko mu Rwanda ab’igitsina gore bangana na 52% mu gihe ab’igitsina gabo ari 48%

like
0
dislike
0
love
2
funny
0
angry
0
sad
1
wow
0