Minisante yemeje ko nta bitaro bigifunga abarwayi babuze ubwishyu

Minisiteri y’Ubuzima (Minisante), yavuze ko nyuma yo kugirwa inama nta bitaro bigifunga abarwayi babuze ubwishyu, ko ahubwo bafatanya n’inzego z’ibanze z’aho bakomoka mu kwishyura ikiguzi cy’ubuvuzi.

Minisante yemeje ko nta bitaro bigifunga abarwayi babuze ubwishyu

Minisiteri y’Ubuzima (Minisante), yavuze ko nyuma yo kugirwa inama nta bitaro bigifunga abarwayi babuze ubwishyu, ko ahubwo bafatanya n’inzego z’ibanze z’aho bakomoka mu kwishyura ikiguzi cy’ubuvuzi.

Mu bihe bitandukanye humvikanye inkuru z’ibitaro bibuza abarwayi gutaha, bikabamarana iminsi runaka bazira ko babuze amafaranga yo kwishyura serivizi z’ubuvuzi bahawe.

Mu kiganiro ‘Sobanukirwa’ cyanyuze kuri Televiziyo y’u Rwanda kuri iki cyumweru, Dr Muvunyi Zubeli, ushinzwe ibikorwa by’ubuvuzi n’ubuzima rusange muri Minisiteri y’Ubuzima, yavuze ko nta murwayi ugifungirwa mu bitaro.

Yagize ati “Ibyo bintu byigeze kubaho nta nubwo byanabayeho hose hari ibitaro byari biremerewe cyane n’abo bantu badafite ubwishyu badafite ubwishingizi, ariko nyuma twagiriwe inama kandi natwe twarabiganiriye turavuga duti ibi ntabwo bikwiye. Uyu mutwaro nta n’ubwo ari n’uw’ibitaro gusa kuko n’uturere tubifitemo uruhare.”

Yakomeje avuga ko ababura ubwishyu batabiterwa n’ubutekamutwe, ahubwo ngo babiterwa n’ubukene ngo kuko n’ababa bafite ubwisungane mu kwivuza hari igihe baba badafite ubushobozi bwo kwiyishyurira 10%.

Ati “Dufatanyije n’uturere cyane cyane ibiro bishinzwe imibereho myiza y’abaturage, turababwira tuti twebwe dufite abantu aba n’aba batabashije kwishyura bafite fagitire ingana gutya, nimudufashe kwishyura dufatanye kwikorera uwo muzigo. Ubu rero birimo biragenda neza.”

Umunyamabanga wa Leta ushinzwe ubuzima bw’ibanze muri Minisiteri y’Ubuzima, Dr Ndimubanzi Patrick, nawe wari witabiriye iki kiganiro yasabye abaturage kutambura ibitaro.

Ati “Ntabwo ushobora kujya mu bitaro ngo ubyambure ngo noneho ukeke ko ibyawe birangiye kuko umuntu ntarwara rimwe, niyo wowe utarwaye mugenzi wawe ararwara. Iyo ubyambuye niho hava ko ya miti, bya bikoresho bidashobora kugurwa, rero tubifate ko ari ibyacu tubifate neza, tubirinde kuko ni ibyacu.”

Ingero z’ibitaro bivugwamo kubuza abantu gutaha kubera ko bavuwe bakabura amafaranga yo kwishyura zirimo ibitaro bya Muhima, ibya Kaminuza bya Kigali (CHUK) n’ibya Nyagatare, aho mu mwaka wa 2016 bigeze kwangira abarwayi bagera 26 gutaha, bamwe muri bo bakaba baramaze amezi hafi abiri bari mu nzu bashyizwemo.