Miss Rwanda yiseguye ku duseke twateguwe ducuritse tukavugisha benshi

Miss Rwanda yiseguye ku duseke twateguwe ducuritse tukavugisha benshi

Abategura irushanwa rya Miss Rwanda, biseguye ku bantu batashimishijwe n’umuteguro wakozwe ubwo batangazaga abakobwa 37 bahagarariye intara n’Umujyi wa Kigali mu irushanwa ry’uyu mwaka.

Mu itangazo bashyize hanze kuri iki Cyumweru, ryagiraga riti “Nk’abategura irushanwa rya Miss Rwanda, duhora twiteguye kwakira inama n’ibitekerezo byubaka. Turabashimira ko mukomeje kuduha ibitekerezo byubaka kuko ni cyo gituma irushanwa rikomeza kwaguka no gutera imbere.”

Rikomeza rivuga ko ibyagaragaye bitagenze neza bijyanye n’umuteguro, bizakosorwa.

Riti “Ibyagaragaye ko bitagenze neza bijyanye n’umuteguro mu gutangaza abakobwa batsinze amajonjora y’ibanze muri Miss Rwanda ya 2021 bizakosorwa ubutaha. Turabashimira ku bitekerezo byiza mukomeza kuduha.”

Iri tangazo ryaje nyuma yaho ku wa 20 Gashyantare 2021, ubwo hatangazwaga abagomba guhagararira Intara n’Umujyi wa Kigali muri Miss Rwanda uyu mwaka, mu muteguro wakozwe hari harimo aho bateguye uduseke dupfunduye twubitse ndetse n’umutemeri watwo wubitse.

Ni ibintu bitashimishije benshi bakurikira iri rushanwa bavuze ko ibi bitakabayeho mu muco nyarwanda ndetse by’umwihariko, mu irushanwa nk’iri ryo guhitamo nyampinga w’igihugu.

Uwitwa Nkuranga Alphonse yagize ati “Umutako mwiza, umuteguro mwiza ni ufite igisobanuro. Miss Rwanda mwashatse kutwereka iki mu giseke cyubitse umutemeri wacyo uri iruhande? Mumfashe nsobanukirwe bitaba ari uwateguye yibwira ko harimo agashya. Igiseke cyubitse kiba cyamennye, kirimo ubusa.”

Rutangarwamaboko nawe yavuze ko ibi bintu bitari bikwiriye; ati “Mutumye nongera kuvuga kuri ibi bya Miss Rwanda kandi narabizeyutse. Intabaza iteka irira ku muziro. Ubusanzwe agaseke karenguriza ku ibanga rihishe ry’ubuzima, iby’umutima. Ariko rero ikirangaye cyangwa cyubitse muba mwigaragaje uko muri, ko iby’agaciro byagateshejwe kandi ko ntakirimo.”

Abandi bantu benshi batanze ibitekerezo bavuga ko uyu muteguro utari uboneye ari nabyo byatumye abategura iri rushanwa bisegura.

Ku wa 20 nibwo hatoranyijwe abakobwa 37 bakomeje mu barenga 400 bari biyandikishije muri Miss Rwanda 2021.