Mozambique: Ikamyo yasanzwemo imirambo y'abantu 64 bikekwa ko ari iy’abanya-Ethiopia

Mozambique: Ikamyo yasanzwemo imirambo y'abantu 64 bikekwa ko ari iy’abanya-Ethiopia

Imirambo y’abantu 64 bikekwa ko bakomoka muri Ethiopia yasanzwe mu ikamyo muri Mozambique, bikaba bikekwa ko bapfuye babuze umwuka.

Abayobozi ba Mozambique batangaje ko iyo kamyo bikekwa ko yari ivuye muri Malawi.

Abantu 14 barokotse muri iyo kamyo basanzwe mu ntara yo mu Burengerazuba yitwa Tete.

Umuyobozi ushinzwe ubuzima mu ntara ya Tete, Carla Mosse yavuze ko ashingiye ku makuru y’inzego zishinzwe abinjira n’abasohoka, iyo kamyo yari yabanje guhagarikwa ubwo yari igeze mu mujyi wa Moatize.

Mosse yavuze ko iperereza ryatangiye ngo hamenyekanye uburyo abo bantu bapfuye, nubwo igikekwa cyane ari uguhera umwuka.

Amélia Direiro, Umuvugizi w’urwego rushinzwe abinjira n’abasohoka yavuze ko ubwo bahagarikaga uwari utwaye iyo kamyo yabanje kubyanga. Yavuze ko abashinzwe abinjira n’abasohoka bumvise amajwi y’abantu basakuriza muri iyo kamyo.

Ako gace iyo kamyo yahagarikiwemo kazwiho kuba inzira y’abajya muri Afurika y’Epfo mu buryo bunyuranyije n’amategeko.