Mu Bushinwa barasabwa kumara ibyo kurya ku isahani ntibabimene(Kweza isahani)

Mu Bushinwa barasabwa kumara ibyo kurya ku isahani ntibabimene(Kweza isahani)

Ubushinwa bwafashe ingamba zo kugabanya kumena ibiryo, nyuma y’uko Perezida Xi Jinping avuze ko ingano y’ibimenwa iteye ubwoba n’agahinda.

Ubukangurambaga bwo kweza isahani butangijwe nyuma y’uko Bwana Xi avuze ko Covid-19 "yatanze impuruza" ku biryo bimenwa.

Yongeyeho ko Ubushinwa bugomba gukomeza guhora butekereza ku ibura ry’ibiribwa nkuko bbc ibitangaza.

Bibaye kandi mu gihe mu majyepfo y’Ubushinwa hamaze igihe havugwa imyuzure yangije amatoni menshi y’ibihingwa byari bigiye gusarurwa.

Gusa ikinyamakuru Global Times kibogamiye kuri leta kivuga ko iyo myuzure itazateza ubucye bw’ibiribwa, ariko ko kumena ibiryo bikwiriye gufatwa nk’ikibazo gikomeye.

Televiziyo y’igihugu yagaragaje kandi inenga amashusho abantu bifashe barimo barya umurundo w’ibiryo.

Nyuma y’ubutumwa bwa Bwana Xi, ikigo cyo kugemura ibiryo cyo mu mujyi wa Wuhan cyasabye inzu z’uburiro (restaurants) kugabanya ingano y’ibiryo ziha abazigana bari mu matsinda.

Mu buryo bushya bwo guha ibiryo abajya muri izo nzu, intsinda ry’abantu 10 rigomba guhabwa amasahani icyenda y’ibiryo.

Gusa ibi ngo bishobora kugorana kuko muri iki gihugu hari umuco umenyerewe wo gutumiza ibiryo byinshi kurusha ibikenewe.

Mu gihe abantu bari mu itsinda, kumara ibiryo ku isahani hari ubwo bifatwa nko kunenga abakiriye abantu - nko gusobanura ko abashyitsi bakirijwe ibiryo bicye.

Ubu buryo bushya bwo guha ibiryo bicye itsinda ry’abantu muri ’restaurants’ bwiswe "N-1", bamwe bahise babwamagana kuri murandasi, bavuga ko "buhutiyeho".

Ku rubuga nkoranyambaga rwa Weibo, rukoreshwa cyane mu Bushinwa, umwe yanditse ati "Niba se umuntu agiye muri restaurant wenyine? Yatumiza amasahani angahe? Zeru?"

Abandi bo bavuze ko ahubwo abantu barira muri za ’restaurants’ atari bo basigaza ibiryo byinshi, ahubwo ko biba cyane mu gusangira kw’abantu benshi gutegurwa n’abategetsi.

Ikigo gitangaza amakuru cya leta, CCTV, cyagaragaje amashusho abantu bifata bari kurya ibiryo byinshi, ibizwi cyane nka "Mukbang" bikorwa muri Aziya no mu Bushinwa.

CCTV ivuga ko benshi muri abo bantu bifotora barya nyuma babiruka, kuko igogora (digestion) riba ryanze kugugara bivuye ku kuvundiranya ibiryo byinshi.

Ikigo World Wide Fund for Nature, ishami ryo mu Bushinwa, kivuga ko muri iki gihugu hagati ya toni 17 na 18 z’ibiryo zamenwe mu 2015.