Mu mafoto dore ibyo utamenye ku karasisi k’Ingabo z’u Rwanda mu #Kwibohora25

Mu mafoto dore ibyo utamenye ku karasisi k’Ingabo z’u Rwanda mu #Kwibohora25
IGIHE Photos

Tariki ya 4 Nyakanga 2019 yari umunsi udasanzwe mu buzima bw’u Rwanda. Ni yo Abanyarwanda bizihirijeho isabukuru y’imyaka 25 u Rwanda rumaze rwibohoye.

Ibihumbi by’Abanyarwanda bizihije uyu munsi ukomeye mu mateka y’igihugu, hibukwa igihe u Rwanda rwatangiriye urugendo rwo kwiteza imbere nyuma yo kuvanwa mu maboko y’ubutegetsi bubi.

Mu mpanuro ze, Perezida Paul Kagame yasabye Abanyarwanda kwigira ku mateka mabi u Rwanda rwanyuzemo ku buryo rutazongera “kuyoba habe na rimwe”.

Ibi birori ku rwego rw’igihugu byabereye kuri Stade Amahoro. Ababyitabiriye barimo n’abakuru b’ibihugu batandatu n’aba za Guverinoma, baryohewe n’umuteguro wabyo binyuze mu karasisi ka gisirikare.

Ni akarasisi kakozwe n’amasibo 22 arimo 19 y’abasirikare babarizwa muri brigade ya 204 n’atatu ya Polisi y’u Rwanda mu gihe atatu muri yo yari agizwe n’abari n’abategarugori.

Ibihumbi byari kuri Stade Amahoro n’abandi barebeye ibi birori mu ngo zabo bishimiye by’umwihariko intambuko y’izi ngabo mu ntambwe idasigana.

Mu kwishimira iterambere u Rwanda rumaze kugeraho nyuma y’imyaka 25 Jenoside ihagaritswe, ingabo zanditse umubare 25 mu kibuga mu kugaragaza urwo rugendo rwose.

Mu gihe cy’akarasisi, ingabo zagendaga zidasigana, umwanya wo gutera ikirenge zikagishingurira rimwe, byaba kuzamura ukuboko bikagenda bityo mu mujyo umwe.

Ibi birori kandi byihariwe cyane n’indirimbo zigaruka ku bufatanye bw’Abanyarwanda mu kwishakamo ibisubizo byubatse igihugu cyari cyashegeshwe mu mpande zose ndetse n’izivuga ku ruhare rw’Ingabo mu kubungabunga umutekano utuma igihugu kiza ku isonga mu bitekanye muri Afurika.

Ku nshuro ya mbere kandi Ingabo z’u Rwanda ziyerekanye mu ntambuko isanzwe ikoreshwa cyane n’Ingabo z’Abashinwa (Chinese-style military parade). Ubusanzwe zakoreshaga akarasisi ko mu bindi bihugu byo mu Burengerazuba bw’Isi.

Muri Mata 2019 nibwo Ingabo z’u Rwanda (RDF) zatumiye abasirikare bakomeye mu Bushinwa ngo baze kuzifasha gutoza abasirikare barwo.

Abatoza batandatu ni bo boherejwe bavuye mu Bushinwa ndetse ni na bo batoje abagera ku 2000 biyerekanye mu karasisi kakozwe ku munsi wo kwibohora.

Mu gihe akarasisi kakorwaga, Brig Gen Jean Baptiste Ngiruwonsanga, wari ukayoboye yatangaga itegeko yifashishije ururimi ruzwi nka Mandarin [rukoreshwa mu bice bimwe by’u Bushinwa].

Nk’iyo yabwiraga abasirikare gukebuka iburyo, na bo bahitaga babikora mu mujyo usa neza n’uburyo bukoreshwa n’igisirikare cy’u Bushinwa.

Mu gihe akarasisi kakorwaga kandi hari abasirikare babiri bo mu Bushinwa bagakurikiye bahagaze kuva ku munota wa mbere kugera ku wa nyuma gasojwe.

Umwe mu batoje ingabo zakoze akarasisi witwa Liu Baoxin yabwiye CCTV ko banyuzwe n’uko Ingabo batoje zaserutse. Yagize ati “Twishimiye cyane uburyo bitwaye.’’

U Bushinwa ni umufatanyabikorwa ukomeye w’u Rwanda mu bikorwa by’iterambere, ubucuruzi, umutekano [u Rwanda rwaguzeyo intwaro, ibifaru na misile z’ubwirinzi], uburezi n’ibikorwaremezo, mu mubano umaze imyaka isaga 46.

U Bushinwa bumaze kwagura ubucuruzi, ishoramari n’imikoranire mu bya gisirikare hagati yabwo na Afurika.

Raporo y’Ikigo Stockholm International Peace Research Institute gikora ubushakashatsi ku makimbirane n’ibijyanye n’intwaro, igaragaza ko hagati ya 2014 na 2018 u Bushinwa bwagurishije intwaro mu bihugu 53. Muri byo Afurika yihariye 20%.

 

 

Akarasisi kakozwe n'amasibo 22 kishimiwe na benshi mu bitabiriye ibi birori muri Stade Amahoro

Muri Jenoside mu 1994 Stade Amahoro yahungiyemo Abatutsi benshi bahigwaga bazira uko bavutse, nyuma y'imyaka 25 ibihumbi by'Abanyarwanda bongera kuhahurira bishimira ubumwe n'ubwiyunge bwikamajwe

Abari muri Stade bitwaje ibirango by'u Rwanda byiganjemo amabendera y'igihugu

Stade Amahoro yari yuzuye impande zose

Ingabo z'u Rwanda mu karasisi ka gisirikare kishimiwe na benshi

Abanyarwanda babarirwa mu bihumbi 20 bari basendereye muri Stade Amahoro mu kwizihiza Umunsi wo Kwibohora

 

Ubwo ingabo zasezeraga abitabiriye ibirori ziyerekana mu karasisi

Ibendera ry'u Rwanda naryo ryari ryazamuwe mu kuzirikana umunsi w'amateka mu buzima bw'u Rwanda

Ingabo z'u Rwanda mu karasisi ka gisirikare kishimiwe na benshi

Akarasisi kakozwe kari karyoheye ijisho. Abagore bitangiye kandi bakomeje kubaka igihugu bagaragaje ubuhanga mu gutambuka

Intambuko ni imwe kandi ibereye ijisho

JPEG - 216.2 kb
U Bushinwa bwari buhagarariwe mu birori byo Kwibohora