Mu minsi mike Munyakazi Sadate ashobora kwegura ku buyobozi bwa Rayon Sports

Mu minsi mike Munyakazi Sadate ashobora kwegura ku buyobozi bwa Rayon Sports

Nyuma y’amezi 10 atorewe kuyobora Rayon Sports, Munyakazi Sadate ashobora kwegura kuri uyu mwanya.

Munyakazi Sadate yatorewe kuyobora Rayon Sports tariki ya 14 Nyakanga 2019 asimbuye Muvunyi Paul wari umaze imyaka ibiri ayobora iyi kipe.

Aya makuru dukesha IGIHE nuko Munyakazi Sadate ari gutekereza uburyo yakwegura ku buyobozi bwa Rayon Sports ndetse amaze iminsi aganira na bamwe bakuriye inzego zitandukanye muri iyi kipe mbere yo gufata icyo cyemezo.

Kimwe mu bibazo yagaragaje kigomba kubanza kubonerwa umuti ni umwenda ikipe imubereyemo, ku mafaranga ye yashyizemo, agera kuri miliyoni 50 Frw.

Uwaganiriye na IGIHE yavuze ko hakomeje ibiganiro na bamwe mu banyamuryango b’Imena muri Rayon Sports kugira ngo azishyurwe ayo mafaranga mu gihe yaba yaravuye ku buyobozi.

Yavuze ko kandi “Sadate naramuka yeguye ku buyobozi bwa Rayon Sports ashobora kuzagirwa umwe mu bayobozi b’icyubahiro b’iyi kipe”, akajya mu cyiciro kimwe n’abarimo Muvunyi Paul, Dr Rwagacondo Emile, Ntampaka Théogène na Ruhamyambuga Paul.

Tariki ya 9 Gicurasi nibwo Munyakazi Sadate yahagaritswe amezi atandatu mu bikorwa by’umupira w’amaguru bitewe n’amagambo yatangaje nyuma y’uko Rayon Sports ititabiriye Igikombe cy’Ubutwari 2020 mu ntangiriro z’uyu mwaka. Iki cyemezo yamaze kukijuririra.

Nyuma y’umunsi umwe ibihano bye bitangajwe, Rayon Sports yashyizeho Akanama Ngishwanama kagizwe n’abagabo barindwi biganjemo abigeze kuyiyobora barimo; Muvunyi Paul, Dr Rwagacondo Emile, Ruhamyambuga Paul, Ngarambe Charles, Ntampaka Théogène, Gacinya Chance Denis na Muhirwa Prosper.

Abo kuri ubu nibo bari gukora ibikorwa bitandukanye by’ikipe birimo kuganira n’umuterankunga SKOL no gushaka abakinnyi bashya bashobora kuzaza muri Rayon Sports mu mwaka utaha w’imikino.

Ku wa Gatatu, Munyakazi Sadate yari yapanze guhura na bamwe mu bakinnyi b’ingenzi muri Rayon Sports bari hagati ya 10 na 14, basigawemo amafaranga baguzwe, ariko baramutegereje baramubura.