Muhadjiri aracyashidikanya kujya muri Rayon Sports bitewe n'ikibazo cy'ubukungu buri muri iyi kipe

Muhadjiri aracyashidikanya kujya muri Rayon Sports bitewe n'ikibazo cy'ubukungu buri muri iyi kipe
Ibiganiro byari bimaze igihe bijya mbere hagati ya rutahizamu Muhadjiri Hakizimana na Rayon Sports yamwifuzaga, byapfuye ku munota wa nyuma.

Hari hashize igihe kirenga ibyumweru bibiri uyu rutahizamu w’ikipe y’igihugu Amavubi avugwa muri Rayon Sports, ndetse yemwe amakuru yaramutse kuri uyu wa gatanu yavugaga ko uyu musore ashobora gusinya uyu munsi.

Byavugwaga ko Muhadjiri Hakizimana yamaze kumvikana na Rayon amafaranga miliyoni 15 z’amanyarwanda nka Recruitment, ndetse iyi kipe ikanamugenera umushahara wa buri kwezi ungana na 1,200,000Rwf.

Amafaranga yose yari yarumvikanye na Rayon Sports yari yaramaze kuboneka, binyuze mu bukangurambaga bwakozwe mu bakunzi b’iyi kipe, icyaburaga kikaba ari ugushyira umukono ku masezerano.

Mu gitondo cyo kuri uyu wa gatanu Muhadjiri yagiye kuganira n’Umuyobozi wa Rayon Sports, Munyakazi Sadate, aho akorera ku Kimihurura ndetse uruhande rwa Rayon Sports rwari rwizeye gusinyisha uyu mukinnyi.

Ibiganiro byamaze isaha irenga ntacyo byatanze nyuma y’uko Hakizimana Muhadjiri asabye ko mu masezerano yagirana n’iyi kipe hashyirwamo ingingo ivuga ko yakwemererwa kuva muri Rayon Sports igihe icyo aricyo cyose haba hari indi kipe imushatse.

Bivugwa ko hari ikipe yo muri Maroc yaba yifuza uyu mukinnyi cyo kimwe na Yanga SC yo muri Tanzania, mu gihe AS Kigali na yo ngo yifuje kumuha miliyoni 20 Frw ku myaka ibiri, akabyanga.

Hari kandi amakuru avuga ko Hakizimana Muhadjiri ari gutinza ibyo gusinyira Rayon Sports kubera ko ari gutinya kuyisinyira bitewe n’ibibazo by’ubukungu biyirimo, ibyatumye ayisaba kumuha icyumweru kimwe cyo kongera kubitekerezaho.

Rayon Sports yari yihaye uyu wa Gatanu nk’umunsi wo gusinyisha uyu mukinnyi byakwanga igatangira gutekereza ku bandi.

What's Your Reaction?

like
0
dislike
0
love
0
funny
1
angry
0
sad
0
wow
0