Musanze: Umuturage ni we wayoboye abishe 14 akabereka inzira kuko ahatuye

Musanze: Umuturage ni we wayoboye abishe 14 akabereka inzira kuko ahatuye

Umuyobozi w’ingabo mu Ntara y’iburengerazuba, Maj. Gen. Alexis Kagame yavuze ko umuturage wo mu Karere ka Musanze ari we warangiye inzira inyeshyamba zo muri RUD-Urunana zishe abaturage 14 zigakomeretsa abandi 18 nk’uko polisi yabitangaje.

Mu mpera z’icyumweru gishize, inyeshyamba z’umutwe wiyomoye kuri FDLR wa RUD Urunana zagabye igitero mu Mirenge ya Kinigi, Musanze na Nyange yo mu Karere ka Musanze.

Ubwo yaganiraga n’abaturage bo mu Mirenge ya Busasamana na Bugeshi ihana imbibi na Congo, Gen. Kagame yavuze ko uyu mururage avuka muri aka karere kandi ko yafashwe.

Ati “  Musanze umuturage wamaze iminsi ine abazanye abari imbere, we yarafashwe. Ni umuturage uvuka hariya. Abaturage baramurebaga bati na we ni wowe ujya kutuzanira abagambanyi ngo baze kwica aba bana bakoraga amandazi hano. Yarafashwe, bari bamuzi neza.”

Gen. Kagame yaburiye abaturage biha gufasha abagizi ba nabi, ko nabo bitazabahira, abasaba kubicikaho.

Guverineri w’intara y’Iburengerazuba, Munyantwari Alphonse na we yagaye abarwanya leta, anenga abagifite amacakubiri. Avuga ko bitabahira muri iki gihe.

Ati “ Abantu bagifite amacakubiri. Abantu bakirwanisha amacakubiri, abashaka gutera igihugu, hari utekereza akumva hari impamvu bafite ngo tuyiganireho niba hari ikibazo tugikemure? Ibibazo birahari ariko tuzakomeza tubikemure (…)”

Guverineri Munyentwari yasabye abaturage kwirinda amacakubiri no guharanira icyabateza imbere.

VOA