Ndayishimiye Dieudonne(Fils) yavuze ukuntu yabuze ibitotsi amaze kumenya ko APR FC imushaka kuko yumvaga ari inzozi

Ndayishimiye Dieudonne(Fils) yavuze ukuntu yabuze ibitotsi amaze kumenya ko APR FC imushaka kuko yumvaga ari inzozi

Ndayishimiye Dieudonne[Fils], myugariro ukina ku ruhande yugarira uheretse gusinyira APR FC, yavuze ko ubwo yumvaga ko APR FC imwifuza yananiwe gusinzira.

Tariki ya 19 Nyakanga 2020, APR FC yerekanye abakinnyi 4 bashya yaguze izifashisha mu mwaka w’imikino wa 2020-2021, harimo na Ndayishimiye Dieudonne wakiniraga AS Muhanga.

Aganira n’urubuga rwa APR FC, uyu musore yavuze ko umunsi wa mbere yumva inkuru y’uko yifuzwa n’ikipe y’ingabo z’igihugu yananiwe gusinzira kubera ibyishimo.

Yagize ati"ku munsi wa mbere Mupenzi Eto’o(ushinzwe kugurira APR FC abainnyi) ambwira ko APR FC inyifuza iryo joro bwankereyeho nabuze ibitotsi, nabwiye papa nti APR FC ishobora kuba igiye kunjyana kandi ntibizagutungure Fils utakimubona hano i Muhanga muri Gicurasi, papa yambwiye ko bitashoboka, ngo ntabwo wava muri AS Muhanga ngo uhite usimbukira muri APR FC. Ukuntu nabireshyeshyanyaga nabonaga APR FC iri hejuru ku munzani.”

Uyu mukinnyi avuga ko n’ubundi abakinnyi bagenzi be bajyaga babimubwira ko ari hejuru ko ari Rayon Sports na APR FC zose ari ku rwego rwo kuzikinira, gusa we ngo yabifatanga nk’ibidashoboka.

Yizeye kuzabona umwanya muri APR FC ngo kuko imikinire y’umutoza Adil yayibonye kandi abona azibonamo. Mu mikino 20 yakiniye AS Muhanga umwaka w’imikino ushize, yatanze imipira 10 yavuyemo ibitego.