Ngo ibanga FARDC yakoresheje yica mudacumura rizayifasha kwikiza n'abasigaye

Ngo ibanga FARDC yakoresheje yica mudacumura rizayifasha kwikiza n'abasigaye

Umuvugizi w’igisirikare cya Repubulika Iharanira Demokarasi ya Congo, Gén. Léon Richard Kasonga Tshibangu, avuga ko bafite ubushobozi bwo kugaba ibitero bagahashya imitwe y’inyeshyamba ziri muri iki gihugu bitabaye ngombwa kwiyambaza amahanga.

Gén. Léon Richard Kasonga asobanura ubushobozi bw’ingabo za Congo (FARDC) yatanze urugero rw’igitero zagabye ku nyeshyamba za FDLR zikica Gen Mudacumura Sylvestre wari uziyoboye, bityo ko ibanga bakoresheje bakamwica ariryo bazakomeza mu guhangana n’indi mitwe.

Yagize ati " Twebwe ubwacu dufite ubushobozi bwo kugaba ibitero ku butaka bwa Congo nk’uko dusanzwe tubikora buri munsi. Guhagarika Mudacumura n’indi mitwe y’inyeshyamba no guhagarika ubugizi bwa nabi mu bice bitandukanye by’igihugu biri mu bikorwa by’izi ngabo (FARDC)".

Yakomeje avuga ko ingabo za Congo zahagurukiye iyi mitwe y’inyeshyamba mu rwego rwo kugarurira abaturage amahoro n’umutekano nyuma y’igihe kirekire bamaze badatekanye kubera ibitero n’ibindi bikorwa by’ubugizi bwa nabi bakorerwa n’izi nyeshyamba.

Ibi yabitangarije itangazamakuru mu gihe byavugwaga ko haba hari ingabo zo mu bihugu Rwanda, Burundi, Uganda na Tanzania ngo zitegura kujya muri iki gihugu cya Congo gutera ingabo mu bitugu FARDC mu rugamba rwo guhashya izi nyeshyamba.

Ubwo hari mu rukerera rwo kuwa 18 Nzeri 2019 mu masaha ya saa kumi za mu gitondo nibwo ingabo z’abakomando ba Hibou Special forces bibumbiye muri Operation Zokola 2 bagabye igitero gikomeye mu birindiro bya FDLR babashije guca mu rihumye umutwe udasanzwe wa CRAP babasha kugariza ibirindiro bya FDLR bica Lt. Gen Mudacumura.