Ni uko FPR igira neza, ariya maguru ya Mudathiru bakayaretse agacika - Kazigaba

Ni uko FPR igira neza, ariya maguru ya Mudathiru bakayaretse agacika - Kazigaba

Impuguke mu mategeko, André Kazigaba, avuga ko ababazwa cyane n’uburyo ubuyobozi bw’ishyaka RNC ritavuga rumwe na Leta y’u Rwanda bwihakanye abari abarwanyi baryo bafatiwe muri Congo- Kinshasa, bakagezwa mu Rwanda ubu bakaba bakurikiranwe n’urukiko rwa gisirikare.

Abo barwanyi ni 25 bakaba biganjemo Abanyarwanda n’Abarundi. umukuru muri bo ni Major (Rtd) Habib Mudathiru we wafashwe yanarashwe akaguru, no mu iburanishwa ryabo uyu musirikare akaba aba ari ku mbago kubera akaguru karashwe.

Kazigaba asobanura uwabohereje ku rugamba, yashimangiye ko ari Kayumba Nyamwasa anashinja kubihakana nyuma yo gufatwa.

By’umwihariko akagaruka ku cyo yise ubugome bwa Mudathiru ngo wakubitaga udufuni bagenzi be iyo mu mashyamba ya Congo ngo bikarangira Imana imuhaye igihano cyo kuraswa akaguru.

Yagize ati "Reka mbabwize ukuri, nabaye umusirikare muto ariko nararebaga, n’abandi babaye abasirikare cyangwa babaye impunzi muri Congo bagakora urugendo ruva za Uvira-Masisi [Sud Kivu ujya Nord] ntabwo wakwifuriza uwawe kurugenda n’imitwe y’inyeshyamba iri muri kariya gace. Aba bana bagenze ibirometero bisaga 1000 n’amaguru, nta biryo, nta miti, nta bikoresho, urwaye cyangwa unaniwe Muthatiru amukubita ifuni."

Yakomeje avuga ko aba barwanyi bagiye gufatwa n’ubundi ngo Mudathiru amaze gukubita ifuni bagenzi be batandatu.

Ati "Abarwaye yarabiyiciye, abananiwe yarabiyiciye, izo zose ni ingaruka za Kayumba kuko niba yarapanze umushinga wa gisirikare ntabwo yagombaga gutinyuka koshya umusaza nka Muthatiru ngo niyice mugenzi we Kanyemera, cyaraziraga ni ya mico yabo yabananiye."

Uyu munyamategeko arakomeza avuga bageze mu Rwanda, uburyo ngo Kayumba yabihakanye n’ubwo bwose ngo Mudathiru we yafashijwe akavurwa akaguru yarashwe, ibintu we avuga ko bitari bikwiye, avuga ko bari kumureka ngo kubera ubugome bwe.

Yagize ati "Ibyababayeho twarabibonye, barinze bagera i Kigali, aho uwo mwita jenerali[Kayumba] abera akaga, na n’uyu munsi ntabwo yari yabemera abo bantu, Mudathiru ageze i Kigali n’izindi nzirakarengane ziri hariya. We rwose kuba ahetse kiriya kiguru ni igihembo Imana yamuhaye cy’ibyo yakoze, yari yishe Kanyemera n’abana yagiye yica mu nzira”.

Ifoto ya Mudathiru yagiye ukwirakwizwa ku mbuga nkoranyambaga aho benshi bashima uburyo umutwe w’igisirikare cy’u Rwanda ushinzwe imyitwarire [Military Police] ukora kinyamwuga, bitewe n’uburyo ufasha uyu musirikare Mudathiru na we wabyivugiye mu rukiko abashima ko bamufasha mu burwayi bwe.


Abo muri Military Police barimo gufasha Mudathiru

Ashingiye ku cyo yise ubugome bwa Mudathiru, André Kazigaba we avuga ko ubu bufasha atarabukwiye, yagize ati “Ahubwo ni uko FPR igira neza, bakagombye kuyaca ariya maguru yombi, ubundi ari byiza bakayashyizeho ishoka bakayacira mu mavi, kuko nibanakuvura agakira azongera agende, none ko yishe abana abaziza ubusa?"

Rtd. Maj.Mudathiru Habib na bagenzi be baregwa ibyaha bine birimo kwinjira mu mutwe w’ingabo utemewe; kugambirira kugirira nabi ubutegetsi buriho; kugirana umubano na Leta y’amahanga bigiriwe gushoza intambara no kurema umutwe w’abagizi ba nabi.

Mudathiru aburana yemera ibyaha byose ndetse akabisabira imbabazi. Mu rukiko kandi yashimiye Leta y’u Rwanda. Aho yagize ati " Nkaba nshimira Leta y’u Rwanda irangajwe imbere na Nyakubahwa Perezida wa Repubulika, uburyo badufashemo, butandukanye n’ahandi uko mbizi. Aho dufungiwe ni byo koko hakwiriye ikiremwamuntu, uburyo dufashwemo nta totezwa, nta yicarubozo turakorerwa, njye rwose nkaba mbishimira ubuyobozi bwa Military Police.’’

Mudathiru wahoze mu Ngabo z’u Rwanda, RDF, Ubushinjacyaha buvuga ko amaze gusezererwa, mu 2013 yerekeje muri Uganda, ahera ko yinjira muri RNC atyo.

Ni military Police ifasha Muthatiru kugera ku rukiko
Muthatiru ashima uburyo Rwanda Military Police imwitaho
 
Inkuru ya Bwiza.com