Niyomugabo n’umuryango we baguye mu manga muri Nyungwe bagatabarwa na RDF barayishimira

Niyomugabo n’umuryango we baguye mu manga muri Nyungwe bagatabarwa na RDF barayishimira

Umuturage witwa Niyomugabo Gad yashimiye Ingabo z’u Rwanda nyuma y’aho we n’umuryango we barokotse impanuka ikomeye, ubwo bagwaga mu manga mu ishyamba rya Nyungwe, zikabageraho mu gihe gito zikabatabara.

Iyo mpanuka yabaye kuri uyu wa Gatatu ahagana saa kumi z’igicamunsi ubwo imodoka Niyomugabo yari atwaye yavaga i Rusizi yerekeje i Kigali hanyuma ikaza kurenga umuhanda ikagwa hasi mu manga mu ishyamba rya Nyungwe.

Niyomugabo Gad yavueze ko muri ayo masaha imvura yagwaga ku buryo umuhanda wari wanyereye cyane.

Ati “Imodoka yarenze umuhanda iramanuka, urabona uko ishyamba rimeze, njye navaga i Rusizi njya i Kigali, naguye epfo mu kuboko kwanjye.”

Yakomeje agira ati “Ni njye wari utwaye imodoka. Aho imodoka yaguye ni habi cyane n’ubu nagize amahirwe mvamo numva ubwenge bugikora n’ingingo zigikora zitavunitse, ariko aho yaguye, abantu twari kumwe bose bari bavuyemo, nagiye nsanga umwe hano, undi hariya. Hari ahantu mu manga cyane, twagize amahirwe abasirikare bahita batugeraho, babanza kureba uko tuva aho hepfo kuko kuhizamura byo ntibyari koroha.”

Nyuma yo kuva aho mu manga, ngo bagejejwe hejuru ku muhanda bakorerwa ubutabazi bw’ibanze, ndetse hahita hiyambazwa na Polisi n’Ibitaro bya Bushenge aba ariho bajyanwa, bakomeza kwitabwaho.

Iyo modoka yarimo abantu bane, bose ni bazima. Umugore w’uyu mugabo yababaye mu bitugu, umwana we akomereka ku mutwe, undi we nta kimenyetso na kimwe ku mubiri afite ariko avuga ko ababara mu nda n’ahandi, ari nawe uhangayikishije ku buryo ibitaro byafashe umwanzuro wo kumwohereza i Kigali mu Bitaro byitiriwe Umwami Faisal kugira ngo yitabweho.

Niyomugabo ahamya ko iyo Ingabo z’u Rwanda zitaba hafi ngo zimutabare we n’umuryango we, ubu haba hari kuvugwa indi nkuru itandukanye n’ishimwe afite ku bwazo.

Ati “Ingabo z’u Rwanda iyo zitahaba sinzi uko byari kugenda, nanjye umwuka wari utangiye kunshirana, unibaza uti iri shyamba ndimo noneho hajemo n’inyamaswa, ariko mu minota mike abasirikare bahise batugeraho bakora ibishoboka byose turabanza turahava.”

Mu ishyamba rya Nyungwe hashize igihe hacungwa cyane n’abasirikare b’u Rwanda bagenzura umutekano waryo intambwe ku yindi, ku buryo ikibazo cyose kibayemo bahita batabara, yaba impanuka cyangwa se n’ibindi byahungabanya umutekano.

Abasirikare b'u Rwanda bamanutse hasi mu manga aho imodoka yari yaguye, barokora abari mur iyi modoka