Niyonzima Olivier Sefu niwe wabaye umukinnyi w’Ukuboza muri Rayon Sports ahembwa na Skol (Amafoto)

Uruganda rwa Skol Brewery Ltd Rwanda, rwatangije ku mugaragaro umushinga wo guhemba umukinnyi w’ukwezi muri Rayon Sports, aho Niyonzima Olivier Sefu yabimburiye abandi ahembwa nk’uwahize abandi mu Ukuboza.

Niyonzima Olivier Sefu niwe wabaye umukinnyi w’Ukuboza muri Rayon Sports ahembwa na Skol (Amafoto)

Uruganda rwa Skol Brewery Ltd Rwanda, rwatangije ku mugaragaro umushinga wo guhemba umukinnyi w’ukwezi muri Rayon Sports, aho Niyonzima Olivier Sefu yabimburiye abandi ahembwa nk’uwahize abandi mu Ukuboza.

Ku nshuro ya mbere ikipe yo mu Rwanda, igiye kugira umuhango wo guhemba umukinnyi witwaye neza buri kwezi nk’uko bikorwa muri shampiyona zateye imbere, cyane cyane ku mugabane w’i Burayi.

Ni umushinga watangijwe n’itsinda ry’abafana rya ‘March Generation’ uterwa inkunga n’uruganda rwa Skol, kuri uyu wa Kabiri ukaba watangirijwe ku mugaragaro mu muhango wabereye ku kibuga cyo mu Nzove aho Rayon Sports ikorera imyitozo.

Mu Ukuboza ntabwo Rayon Sports yitwayemo neza cyane kuko yakinnye imikino itandatu, itsindamo itatu, inganya umwe itsindwa ibiri. Gusa iyi mikino yose Niyonzima Olivier Sefu, wahembwe yayigaragayemo iminota 90 yose, atsindamo igitego kimwe anatanga imipira ine yavuyemo ibitego.

Umuyobozi ushinzwe kumenyekanisha ibicuruzwa mu ruganda rwa Skol, Benito Karemera, yemeje ko iki gikorwa ngarukakwezi cyashyizweho mu rwego rwo kongera ubushake n’ihangana mu ikipe batera inkunga.

Yagize ati “Ni igikorwa tuzajya dutegura buri kwezi. Ubu dutangiye duhemba igikombe n’amafaranga ibihumbi 100 Frw, ariko azagenda yiyongera bitewe n’agaciro k’uyu muhango uko kazagenda kazamuka.”

Yakomeje agira ati “Twiyemeje kubikora kuko bitera abakinnyi gukora cyane bahanganira iki gihembo, bigatanga umusaruro ku ikipe muri rusange kandi umusaruro wa Rayon Sports natwe tuwugiramo inyungu kuko turi abafatanyabikorwa bayo.”

Niyonzima Olivier Sefu watsinze bagenzi be babiri; Manzi Thierry na Michael Sarpong bari bahanganye, yashimye ikipe yose muri rusange kuko bafatanya gushaka intsinzi ya Rayon Sports, anahiga gukomeza gukora cyane ngo iki gihembo azakisubize no mu kwezi gutaha.

Uyu mukinnyi atorwa hagendewe ku majwi y’itsinda ry’abatoza ba Rayon Sports, abanyamakuru n’abakunzi b’iyi kipe batora binyuze ku mbuga nkoranyambaga za Skol Brewery Ltd Rwanda n’iza Rayon Sports.

Sefu yahembwe nk'umukinnyi mwiza w'Ukuboza 2018

Byabarenze baranamuterura

Yatsinze igitego kimwe atanga n'imipira ine ivamo ibitego bimuhesha igihembo

Igihembo cyatanzwe ni icy'umukinnyi wahize abandi mu Ukuboza 2018

Ni umukinnyi wagaragaje urwego rwiza mu kwezi gushize

Ni umukinnyi wishimiwe n'abafana cyane

Niyonzima Olivier Sefu yahembwe nyuma yo gukora imyitozo yitegura guhangana na Etincelles FC mu gikombe cy'Intwari kizatangira kuri uyu wa Gatandatu

Niyonzima Olivier Sefu yahereweho mu mushinga wa Skol wo guhemba abakinnyi ba Rayon Sports

Umuhango wabereye mu Nzove witabiriwe n'abafana benshi

Umuyobozi ushinzwe kumenyekanisha ibicuruzwa mu ruganda rwa Skol, Benito Karemera yemeje ko amafaranga aherekeza igihembo azakomeza kwiyongera