Nouvelle Zélande: Uwagabye igitero ku musigiti yabikoze amaze koherereza ubutumwa Minisitiri w’Intebe

Umwiyahuzi wishe abantu ku musigiti muri Nouvelle Zélande yabikoze nyuma y’iminota mike yoherereje ubutumwa abantu barimo Minisitiri w’Intebe amumenyesha ibigiye kuba.

Nouvelle Zélande: Uwagabye igitero ku musigiti yabikoze amaze koherereza ubutumwa Minisitiri w’Intebe

Umwiyahuzi wishe abantu ku musigiti muri Nouvelle Zélande yabikoze nyuma y’iminota mike yoherereje ubutumwa abantu barimo Minisitiri w’Intebe amumenyesha ibigiye kuba.

Minisitiri w’Intebe, Jacinda Ardern, yavuze ko uwo mwicanyi wahitanye abantu 50 mu Mujyi wa ChristChurch ubutumwa yohereje kuri email bwari bugizwe n’inyandiko y’amapaji 74 bwamagana abanyamahanga, avuga ko bavogereye igihugu cyabo.

Iyo nyandiko umwiyahuzi yayohereje mbere y’iminota icyenda ngo atangire kurasa abantu mu musigiti wa Al Noor.

Jacinda yagize ati “Ntiyigeze ashyiramo aho bigiye kubera, nta makuru arambuye yatanze. Iyo tuba dufite uburyo bwo kubihagarika tuba twarabikoze.”

Ubwo butumwa ngo bwohererejwe n’abandi bantu bagera kuri 30 nkuko Aljazeera yabitangaje.

Igitero cyo kuri uyu wa Gatanu ni kimwe mu bikomeye Nouvelle Zélande yagize mu mateka yayo.

Polisi yo muri icyo gihugu yatangaje ko abandi bantu 34 bajyanywe mu bitaro, 12 muri bo ni indembe.

Umugabo umwe w’imyaka 28 witwa Brenton Tarrant yahise atabwa muri yombi akekwaho ubwo bwicanyi. Kuri uyu wa Gatandatu yagejejwe imbere y’urukiko ntiyisobanura, akazagarurwamo tariki 5 Mata.

Ubwo umwicanyi yarasaga abantu ku musigiti, yari yambaye Camera yafataga amashusho yatambukaga imbonankubone kuri Facebook.

Facebook yahise isiba ayo mashusho ndetse yiyemeza ko urayakwirakwiza kuri urwo rubuga wese irayasiba.

Abantu 50 baguye muri iki gitero n’aho abandi benshi barakomereka bikabije

Minisitiri w'Intebe, Jacinda Ardern, yatangaje ko umwicanyi yamwoherereje email mbere yo kujya kurasa abaturage