Nubwo abaturanyi ba Trump batashakaga guturana nawe i Mar-a-Lago, ubutegetsi bwemeje ko ahatura

Nubwo abaturanyi ba Trump batashakaga  guturana nawe i Mar-a-Lago, ubutegetsi bwemeje ko ahatura

Inkuru nziza kuri Donald Trump ni uko ubu yemerewe gukomeza kuba ku rugo rwe ruzwi nka Mar-a-Lago ruri ahitwa Palm Beach muri leta ya Florida, mugihe yari yugarijwe no kuhirukanwa.

Mu nama y'ubutegetsi y'umujyi wa Palm Beach yateranye kuwa kabiri, umunyamategeko wa Trump yasobanuye ko Trump ari umukozi w'urwo rugo rwe rufatwa nka 'club' (ahantu h'imyidagaduro).

Ibyo bisobanuye ko yemerewe n'amasezerano amaze imyaka ibarirwa muri za mirongo avuga ko nta muntu wemerewe kuba muri Mar-a-Lago atahakora.

Mar-a-Lago ni inyubako ndangamateka kandi nyaburanga izwi cyane muri Florida. Trump yayiguze mu 1985, akajya yigira kubayo mu bihe by'ubukonje.

Akiva muri White House, niho yahise ajya. Gusa bamwe mu baturanyi be bashakaga ko ahava, bavuga ko kubayo kwe binyuranyije n'amasezerano bumvikanyeho mu myaka hafi 30 ishize, amasezerano yahinduye aha hantu umutungo bwite.

Inama y'ubutegetsi bwa Palm Beach yibanze ku bibazo by'abatuye hafi yayo bitaye cyane ku gaciro ka Mar-a-Lago, batekereza ko umujyi wabo hari ukuntu ukwiye kugaragara, kandi bafite ingingimira ku muturanyi wabo w'icyamamare.

Umunyamategeko Philip Johnston ukorera umuryango witwa Preserve Palm Beach yavuze ko bafite ubwoba ko Trump azangiza isura "yo kwiyubaha" y'abatuye hano.

Mu myaka ishize, Trump yubatse urukuta rwa metero 213 rukingira aha hantu, umuturanyi umwe byaramurakaje, nubwo bwose ntacyo yashoboraga kubikoraho.

Ubushyamirane bwa Trump n'abaturanyi be kenshi bwabaga ku bintu bito Trump yashoboraga gukora kuri urwo rugo rwe abaturanyi bo babona nk'ahantu ndangamateka y'agace kabo.

Ibyo kuba batifuzaga ko aza kuhatura bihoraho, byo ubu bisa n'ibyarangijwe n'inama y'ubutegetsi yaho.

Nyuma y'iyo nama, abayigize batoye bemeza ko ntacyabuza Trump kuhatura, gusa agakomeza kubahiriza amasezerano bagiranye.