Nyagatare: Babiri bafashwe bakekwaho kubeshya ko bacuruza imashini ikora amadolari batawe muri yombi

Nyagatare: Babiri bafashwe bakekwaho kubeshya ko bacuruza imashini ikora amadolari batawe muri yombi

Urwego rw’Ubugenzacyaha (RIB) rwafashe abantu babiri bakurikiranyweho icyaha cy’ubwambuzi bushukana bakoreye mu Karere ka Nyagatare babeshya ko bagurisha imashini ikora amadolari.

Abafashwe bakekwaho kuba barashutse umuntu bakamugurisha imashini bavuga ko ikora amadolari.

Abo bambuzi bari bamwijeje kumushakira ibyangombwa bimwemerera kujya gukorera ayo madolari muri Kenya, abishyura 11 540 000 Frw.

RIB itangaza ko izo mashini zikora amadolari ntaho zicururizwa ndetse n’ubwo burenganzira bumwemerera kujya gukora amadolari nta rwego na rumwe rubutanga.

Aba batekamutwe bafashwe hari uwamaze gutwara 6 430 000 Frw agerageza guhindura umwirondoro we yiyita amazina ya Maniraguha Egide.

Urwego rw’Ubugenzacyaha rurasaba Abanyarwanda kwirinda kwishora mu byaha by’ubutekamutwe aho benshi babikora bagamije gukira byihuse no kurya iby’abandi batavunikiye bakamenya kandi ko bihanwa n’amategeko.

RIB yibukije abaturarwanda kugira amakenga ku muntu wese ugushishikariza ko mukorana ibikorwa yita ishoramari rigushora mu byaha bihanwa n’amategeko ikaba itazihanganira umuntu wese wishora mu bikorwa by’ubutekamutwe agamije gutwara amafaranga cyangwa indi mitungo y’abaturarwanda.

Mu butumwa bw’uru rwego rwasabye uwo ariwe wese ufite amakuru ku bakora ubu butekamutwe kubimenyesha ishami rya RIB rimwegereye kugira ngo bikurikiranwe cyangwa agatanga amakuru ku murongo wa RIB utishyurwa wa 166.

Abafashwe bafungiwe kuri Sitasiyo ya RIB ya Kicukiro bakaba bagiye gukurikiranwaho icyaha cyo kwihesha ikintu cy’undi hakoreshejwe uburiganya.

Igitabo cy’amategeko ahana ibyaha mu Rwanda mu ngingo yaryo ya 174 iteganya ko uwihesha umutungo w’undi, imari ye cyangwa igice cyayo mu buryo bw’uburiganya yiyitirira izina ritari ryo cyangwa umurimo adafite cyangwa akizeza icyiza aba akoze icyaha, iyo abihamijwe n’urukiko ahanishwa igihungo kiri hagati y’imyaka ibiri n’itatu n’ihazabu iri hagati ya miliyoni 3 Frw na miliyoni 5 Frw.