Nyanza: Umupolisi wari ushinzwe gufasha abakiriya yitabye Imana mu buryo bw’amayobera

Nyanza: Umupolisi wari ushinzwe gufasha abakiriya yitabye Imana mu buryo bw’amayobera

Umusore usanzwe ari umupolisi uri mu kigero cy’imyaka 30 y’amavuko yapfuye urupfu rutunguranye, birakekwa ko yaba yazize indwara abandi bo mu nshuti ze bakavuga ko ashobora kuba yarozwe.

Mu gitondo cyo kuri uyu wa Mbere tariki 2 Werurwe 2020 nibwo ku mbuga nkoranyambaga hacicikanye ifoto y’umupolisi wari usanzwe akorera kuri Police station ya Busasamana mu karere ka Nyanza witwa Nsabimana Daniel.

Bamwe mubo bakoranaga mu kazi ka buri munsi ko gucunga umutekano n’inshuti ze z’abasivile batangarije UKWEZI ko yapfuye ariko nabo kumenya icyo yazize bitoroshye kuko bikiri mu iperereza.

Umwe mu nshuti ze za hafi ariko w’umusivile baherukanaga kuwa Gatanu avuga ko yatunguwe n’urupfu rw’ uyu mupolisi bari inshuti.

Yagize ati "Kuwa Gatanu twari kumwe nyura aho akorera (kuri Police) ari kuganira n’umupolisikazi arambona arampamagara araza aransuhuza ubona nta kibazo afite turajyana agiye kwiyogoshesha ubwanwa tugezeyo ngo abona biri gutinda duhita dusubirayo, mugitondo nibwo numvise ko yapfuye ariko rwose n iibintu bitumvikana nananiwe kubyakira yewe kugira icyo nkora byanze kubera we".

Undi wari usanzwe ari inshuti ye nawe w’umusivile ukorera mu mujyi wa Nyanza yadutangarije ko urupfu rwe yarumenye hagati ya saa mbiri na Saa tatu z’ijoro

Ati "Nabonye uwo bakoranaga mu muhanda turaganira ahita ambwira ko atishimye bitewe n’urupfu rwa mugenzi we, mubajije uwo ari we aramumbwira nsanga ari inshuti yanjye, uwo twaganiriye hagati ya saa mbiri na saa tatu z’umugoroba yambwiye ko nyakwigendera yageze ku bitaro i Nyanza bamutera urushinge agahita apfa bigakekwa ko yarozwe"

Twagerageje kuvugana n’umuvugizi wa Polisi mu ntara y’Amajyepfo CIP Twajamahoro Slyvestre inshuro zose ntiyitaba telefone gusa nyuma twaje kumenya ko ari mu nama i Kigali kuva ejo ku Cyumweru.

Nyakwigendera Nsabimana Daniel yari afite icyiciro cya kabiri cya Kaminuza mu ishami ry’uburezi, apfuye ari ingaragu akaba yari asanzwe ari umukozi wa Polisi ushinzwe gufasha abakiriya (Customer care) kuri Police station ya Busasamana. Umurambo we wajyanwe i Kigali mu bitaro bya Kacyiru gukorerwa isuzuma ngo hamenyekane icyo yazize.