Perezida Kagame na Perezida Nkurunziza w’ u Burundi barahurira muri Kongo

Perezida Kagame na Perezida Nkurunziza w’ u Burundi barahurira muri Kongo

Abayobozi ba Repubulika ya Demukarasi ya Kongo batangaje ko Perezida w’ u Rwanda Paul Kagame na Perezida w’ u Burundi Pierre Nkurunziza bari ku rutonde rw’ abashyitsi bitabira umuhango wo gufungura Laboratoire y’ ubuhinzi ya mbere muri Afurika.

Perezida Kagame na Perezida Nkurunziza baheruka guhura mu myaka ine ishize. Icyo gihe bahuriye mu karere ka Huye tariki 13 Mata 2015.

Kuva muri uwo mwaka kugeza ubu u Rwanda n’ u Burundi bibanye nabi ndetse bamwe mu barwanya ubutegetsi bw’ u Rwanda baherutse gutabwa muri yombi babwiye urukiko ko u Burundi bubashyigikiye.

Umubano utifashe neza hagati y’ ibi bihugu waciye intege urujya n’ uruza hagati y’ abaturage b’ ibi bihugu ubusanzwe bahuriye kuri byinshi birimo no kuba bumvikana mu itumanaho batagombye umusemuzi.

Biteganyijwe ko abakuru b’ ibi bihugu baza guhura mu gihe mu kwezi gushize abafasha babo Jeannette Kagame na Denise Nkurunziza bahuriye i New York mu nama y’abagore b’abategetsi b’ibihugu.

Jean Bosco Sebishyimbo, umwe mu bategetsi mu burasirazuba bwa Congo, yabwiye BBC ko muri aka gace hari imitwe myinshi y’inyeshyamba z’Abarundi n’iz’Abanyarwanda babangamiye umutekano w’aka karere.

Hashyizweho komisiyo ihuriwemo n’ibihugu by’u Burundi, DR Congo n’u Rwanda mu kurangiza ikibazo cy’iyi mitwe.

Depite Sebishyimbo yabwiye BBC ko abakuru b’ibi bihugu nibamara guhura uyu munsi ku wa kabiri tariki 8 Ukwakira 2019 bafungura ’laboratoire’ y’ubuhinzi, baranahura n’iriya komisiyo biga ku mutekano w’ibi bihugu.

Inzobere zinyuranye mu bya politiki n’ubutegetsi zivuga ko mu biganiro ariho haboneka amahoro kurusha mu ntambara.