Perezida Kagame yavuze ku myitwarire ya Ingabire Victoire nyuma yo gufungurwa no ku rupfu rwa Kizito Mihigo

Perezida Kagame yavuze ku myitwarire ya Ingabire Victoire nyuma yo gufungurwa no ku rupfu rwa Kizito Mihigo

Perezida Kagame yavuze ko nyuma y’imyaka ibiri Ingabire Victoire ahawe imbabazi akava muri gereza, bimwe mu byari byaratumye afungwa, yasohotse agakomeza kubikora birimo n’imikoranire n’imitwe yitwaje intwaro yo mu karere igamije guhungabanya umutekano w’u Rwanda ndetse ko mu gihe bikomeje, nta kabuza azashyirwa mu myanya umukwiriye.

Kuva mu 2010 ubwo Ingabire yatabwaga muri yombi, hakunze kuvugwa uburyo yakoranye inshuro nyinshi n’imitwe igamije guhungabanya u Rwanda, uhereye kuri FDLR n’indi.

Mu rubanza rwe icyo gihe yashinjwaga na Lt Col Nditurende Tharcisse wasobanuye ko bagiranye imishyikirano, Ingabire amusaba kwitandukanya na FDLR bagashinga umutwe w’abasirikare wa FDU-Inkingi, ndetse ko yanamwoherereje itike kuri Western Union, bahurira i Kinshasa mu 2008 na Brazzaville babiganiraho. Mu biganiro byabo, ngo bategura ibikorwa by’iterabwoba n’intambara mu Rwanda.

Nyuma y’uko afunguwe mu 2018, yakunze guhamagazwa n’inzego zishinzwe iperereza kugira ngo zimubaza ku mikoranire ye n’abagamije guhungabanya umutekano w’igihugu. Ingero za hafi ni nyuma yo mu Ukwakira 2019, ubwo mu Karere ka Musanze abantu bitwaje intwaro bagabye ibitero mu baturage, bica 14 mu buryo bubabaje abandi barakomereka. Abagabye icyo gitero bemereye itangazamakuru ko baturutse mu mutwe wa RUD Urunana, mu rwunge rw’indi mitwe yitwaje intwaro irimo FDLR FOCA na RNC.

Ni imitwe y’abarwanyi ishamikiye ku mashyaka atanu yishyize hamwe mu cyiswe P5, arimo Amahoro People’s Congress, Forces Démocratiques Unifieés – Inkingi (FDU-Inkingi) ya Ingabire; People’s Defence Pact-Imanzi (PDP-Imanzi), Rwanda National Congress (RNC) na PS Imberakuri.

Ku wa 19 Kamena, Umukuru w’igihugu yagiranye ikiganiro na François Soudan wa Jeune Afrique n’Umunyamakuru Nicholas Norbrook wa The Africa Report, cyabaye hifashishijwe ikoranabuhanga mu gihe Isi yose ihangayikishijwe n’icyorezo cya Coronavirus.

Ni ikiganiro cyagarutse ku ngingo zitandukanye guhera ku mubano w’u Rwanda n’amahanga, ku cyorezo cya Coronavirus, kuri politiki y’imbere mu gihugu kugeza no ku ngingo ziri kuvugwaho cyane muri iki gihe ku rwego mpuzamahanga zirimo n’urupfu rwa George Floyd, umwirabura uherutse kwicwa n’umupolisi muri Amerika.

Perezida Kagame yavuze ko Ingabire yaburanishijwe agahamywa ibyaha birimo n’imikoranire ye n’imitwe yitwaje intwaro ifite uruhare mu guhungabanya akarere.

Yavuze ko na mbere hose amakuru y’imikoranire ye n’iyi mitwe yabonywe n’inzego z’u Rwanda ndetse na polisi yo mu bindi bihugu cyane mu Burayi, ari ibinti bishimangira umugambi we.

Ati “Urubanza rwe, abanyamakuru, abadipolomate n’indorerezo babashije kurukurikirana, rwabaye mu mucyo. Yarafunzwe, hanyuma hashize imyaka ibiri ahawe imbabazi. Twamubabariye nk’uko twababariye abajenosideri benshi mu gihe cyashize, tukabarekura batarangije igihano cyabo twizeye ko batangira ubuzima bushya.”

Yakomeje avuga ko ikibazo ari uko Ingabire yasohotse muri gereza akongera agasubira mu bikorwa byamurangaga mbere byo gukorana n’imitwe yitwaje intwaro yo hanze y’igihugu ku buryo bisa n’ibyatumye yiyumva nk’intwari irwanira ukwishyira ukizana.

Ati “Nta kabuza batekereza ko u Rwanda rukeneye kuyoborwa n’umuntu uri ku rwego rwe, umuntu w’intagondwa. Ntabwo nzi umwanzuro ubutabera buzafata, ntabwo nzi ikizabaho. Gusa ikintu kimwe ni uko azashyirwa mu mwanya umukwiriye, uko dosiye ye yaba iteye kose.”

Ubwo Ingabire yavaga muri Gereza, yavuze ko ‘uko ninjiyemo niko nsohotse” kuko ngo n’ubundi yari yafunzwe nta mpamvu. Ni imvugo yanyuranyaga n’ubusabe bwe bw’imbabazi, aho yari yemereye Umukuru w’Igihugu ko aramutse ababariwe agafungurwa, yazaba intangarugero muri sosiyete nyarwanda, gusa byose yaje kubyigarika, avuga ko nta mbabazi yigeze asaba.

Ntacyo Kizito yaburanye igihugu

Perezida Kagame kandi yabajijwe icyo atekereza ku byavuzwe nyuma y’urupfu rwa Kizito wapfuye muri Gashyantare yiyahuye aho yari afungiye nk’uko byemejwe na Polisi y’Igihugu.

Umukuru w’Igihugu yavuze ko umuntu uwo ariwe wese ugira uruhare mu kwangiza ubuzima bwe, ari we uba wikururiye ibibazo, hatitawe ku kuba ari umuhanzi cyangwa se undi n’ubwo yaba yarahawe igihembo cya Nobel cyo guharanira amahoro.

Yavuze ko yamenye Kizito nyuma y’uko ashimwe n’abantu benshi ku bw’ubuhanga bwe mu kuririmba no kwandika indirimbo, afata umwanzuro wo kumufasha.

Ati “Nafashe umwanzuro wo kumufasha. Twamwishyuriye amashuri mu Bubiligi no mu Bufaransa, nyuma aragaruka, nabwo guverinoma ikomeza kumufasha kubyaza umusaruro impano ye. Ku mpamvu ntazi, agirana imikoranire n’imitwe y’abagizi ba nabi kimwe na Ingabire.”

“Kimwe na we [Ingabire], yarafashwe, araburanishwa, arafungwa, arababarirwa. Kimwe na Ingabire na none yongeye kubikora nyuma yo gufungurwa. Uzi icyakurikiyeho: Polisi yamufashe agerageza kwambuka umupaka ngo yinjire i Burundi mu buryo bunyuranyije n’amategeko. Ibi ni ibintu bifite gihamya, nta kindi. Ni amakosa ye.”

Perezida Kagame yavuze ko hari abanenga u Rwanda barushinja kutubahiriza uburenganzira bwa muntu, bumva ko ibihe bibi u Rwanda rwanyuzemo kuva mu gihe cy’ubukoloni ari amakosa y’Abanyarwanda.

Yatanze urugero ku buyobozi bwa Habyarimana, avuga ko bwarangwaga na demokarasi mu maso y’Abanyaburayi hamwe n’ubuyobozi bw’u Bufaransa bw’icyo gihe bwamutera ingabo mu bitigu ariko ubu buri wese azi neza ko we n’abamufashaga bagize uruhare mu gutegura Jenoside yakorewe Abatutsi.

Ni mu gihe abashyize iherezo kuri ayo mahano yagwiriye igihugu, bafatwa n’imiryango itandukanye nk’abantu bahonyora uburenganzira bwa muntu.

Ati “Ibi ni ubuswa buhambaye rwose. Ku munsi w’urubanza, nizera ko nzabona amanota meza kurusha abaduciraho iteka bitwikiriye ubwisanzure. Naharaniye ubwisanzure n’uburenganzira bw’abaturage kurusha abo bose baduha amasomo. Gusa na none ntabwo turi intungane, usibye nta n’intungane ibaho.”