RDF yatangiye kwandika abifuza kwinjira mu ngabo z’igihugu

RDF yatangiye kwandika abifuza kwinjira mu ngabo z’igihugu

Ubuyobozi bw’Ingabo z’u Rwanda (RDF) bwatangiye kwandika abifuza kwinjira mu gisirikare ku rwego rw’aba-Ofisiye n’abasirikare bato, bikaba biri gukorerwa mu tugari twose tw’igihugu kuva tariki 7-16 Kanama 2020, hubahirijwe amabwiriza yo kwirinda Covid-19.

Intangazo rya Minisiteri y’ingabo rivuga ko abo ku rwego rwa Ofisiye ari abaziga mu ishuri rikuru rya gisirikare rya Gako (Rwanda Military Academy-Gako), bakarangiza bafite impamyabumenyi y’icyiciro cya Kabiri cya Kaminuza mu mashami atandukanye.

Basabwa kuba bararangije amashuri yisumbuye kandi bafite imyaka iri hagati ya 18 na 23 y’amavuko.

Ni mu gihe abifuza kwinjira mu ngabo z’u Rwanda ku rwego rw’abasirikare bato basabwa kuba bararangije amashuri yisumbuye kuva kuri atatu kugera kuri atandatu nabo bafite hagati y’imyaka 18 na 23 y’amavuko.

Uwifuza kwinjira mu ngabo agomba kuba; ari umunyarwanda ufite ubushake, afite ubuzima buzira umuze kandi byaremejwe na muganga wemewe na leta. Agomba kuba atarakatiwe n’inkiko, ari ingaragu kandi ari inyangamugayo.

Abiyandikisha kujya mu cyiciro cy’abasirikare bato bitwaza icyemezo cy’uko barangije amashuri kuva kuri atatu kugera kuri atandatu yisumbuye naho abajya mu ba-Ofisiye bakitwaza impamyabumenyi y’amashuri y’isumbuye.

Itangazo rya RDF ryashyizweho umukono n’Umuyobozi mukuru ushinzwe abakozi Lt Col Peterson Mutsinzi rivuga ko abari bariyandikishije mbere batazongera kwiyandikisha ahubwo ko bazajya gukora ikizamini.

Ibizamini bizatangira gukorwa tariki 17-23 Kanama 2020 sa mbili za mu gitondo, Bikazabera mu Ntara zose n’umujyi wa Kigali.