RIB yafashe wa mugabo wishe umugore we wari umaze iminsi yihishahisha

RIB yafashe wa mugabo wishe umugore we wari umaze iminsi yihishahisha
Urwego rw’Igihugu rw’Ubugenzacyaha kuri uyu wa Gatandatu, rwatangaje ko rwataye muri yombi Nshimiyimana Emmanuel wo mu murenge wa Rukumberi mu karere ka Ngoma, nyuma y’igihe rumushakisha ngo aryozwe icyaha cyo kwica umugore we yakoze.

Mu rukerera rw’itariki ya 03 Ukwakira ni bwo Nshimiyimana yishe umugore we witwa Ntabahuzimana Hilarie amukubise umupanga, ahita azimira.

Umunyamabanga Nshingwabikorwa w’Umurenge wa Rukumberi, Mbarushimana Ildephonse, yavuze ko intandaro yo kwiyicira umugore ari ubuharike.

Yavuze ko nyakwigendera yari umugore w’isezerano wa Nshimiyimana, akaba yaramwishe yagiye gusaba amafaranga ya mituelle z’abana babyaranye.

Yagize ati: "Nyakwigendera yari yaje ngo kugira ngo yake umugabo we Mituelle y’abana be, hanyuma rero araza acumbika ku muturanyi, ariko bisa n’aho uwo mugabo we yari yamenye amakuru aramurarira."

"Mu masaha rero ashyira saa munani z’ijoro, kwa kundi umuntu asohoka agiye kwinanura n’umubiri, umugore yasohotse, umugabo ahita amwirukaho birangira amwishe."

Ngo uyu mugore mu kwiruka ahunga, yavugije induru hasohoka umwana w’umuturanyi ageregeza kumukurikira ngo amutabare, birangira Nshimiyimana na we amukomerekeje ku kuboko.

Nyuma y’uko Nshimiyimana yishe uriya wari umugore we, ku bufatanye n’Urwego rw’Igihugu rw’Ubugenzacyaha hatanzwe amatangazo, kugira ngo uwabona aho ari abe yatanga amakuru afatwe.

RIB yavuze ko Nshimiyimana Emmanuel yafatiwe mu karere ka Kayonza aho yari amaze ibyumweru bibiri yihishahisha.

Iti: "RIB irabamenyesha ko Nshimiyimana Emmanuel washakishwaga n’Ubugenzacyaha kubera icyaha akekwaho cyo kwica umugore we agahita atoroka yafashwe ku gicamunsi cy’uyu munsi. Yafatiwe aho yihishahishaga mu Karere ka Kayonza, Umurenge wa Ndego, Akagari k’Isangano, Umudugudu wa Kanyinya."

RIB yavuze ko Nshimiyimana yafashwe ku makuru yatanzwe n’abaturage, ubu akaba afungiwe kuri Sitasiyo yayo ya Kibungo mu gihe hagitegerejwe ko ashyikirizwa ubushinjacyaha.

like
0
dislike
0
love
0
funny
0
angry
0
sad
0
wow
0