RIB yatangiye guhiga bukware umusore ukekwaho kwica umunyamideli Alexia Mupende

RIB yatangiye guhiga bukware umusore ukekwaho kwica umunyamideli Alexia Mupende

Urwego rw’Igihugu rushinzwe Ubugenzacyaha rwatangiye gushakisha umusore wari umukozi wo mu rugo ukekwaho kwica Umunyamideli Alexia Uwera Mupende.

Mu ijoro ryo kuri uyu wa 08 Mutarama 2019, nibwo hasakaye inkuru y’urupfu rw’umunyamideli Alexia Uwera Mupenda bivugwa ko yishwe n’umukozi wo mu rugo rw’iwabo.

Umwirondoro wakwirakwijwe ku mbuga nkoranyambaga ugaragaza ko uyu musore yitwa Niyireba Antoine yavutse ku wa 19 Werurwe 1996.

Irangamuntu ye igaragaza ko yatangiwe mu Karere ka Karongi ahitwa Mubuga.

Mu kiganiro IGIHE yagiranye n’Umuvugizi w’Urwego rw’Igihugu rushinzwe Ubugenzacyaha, Mbabazi Modeste, yahamije ko uyu mukozi wo mu rugo ari gushakishwa.

Ati “Hari ibiri gukorwa kuko nyuma y’aho amakuru amenyekaniye inzego zose zihutiye kugerayo, hegeranywa ibimenyetso hanyuma batangira gukurikirana. Harakekwa ko yaba yishwe n’umukozi wo mu rugo.”

Ubwo twavuganaga n’Umuvugizi w’Urwego rw’Igihugu rushinzwe Ubugenzacyaha mu gitondo cyo kuri uyu wa Gatatu, uyu musore wahise acika yari ataraboneka ariko hari gukorwa iperereza rigamije kumuta muri yombi.

Ati “Yabuze ariko hatangiye ibikorwa byo kumushakisha no gukora ibisabwa kugira ngo ikurikiranacyaha rikomeze.”

Ubugenzacyaha ntiburamenya imibanire yari iri hagati y’aba bombi cyangwa se icyaba cyateye Niyireba kwica Mupende kuko nta wundi muntu wari uhari biba.

Mbabazi ati “Uko yari abanye n’umukozi twe ntabwo twahita tubimenya aka kanya. Icyo bapfuye ni umwe muri bo wakitubwira kuko nta wundi muntu wari mu rugo. Nibo bonyine bari bahari, abandi bo mu muryango ntabwo bari bahari.”

Alexia Mupende w’imyaka 35 yateganyaga gukora ubukwe n’umukunzi we witwa Allan Rwamo Kweli, tariki ya 16 Gashyantare 2019 n’impapuro z’ubutumire zari zaramaze kujya hanze.

Yatangiye kumenyekana mu by’imideli mu 2012 ubwo yatsindaga irushanwa rya Rwanda Premier Model Competition.

Mbere yaho mu 2006 yaje mu bakobwa batandatu ba mbere mu marushanwa ya Face of Africa ari nabyo byamwinjije ku ruhando rw’abanyamideli mu myaka itandatu yakurikiyeho.

Yagiye yitabira ibikorwa by’imideli bikomeye ku Isi nka Dubai Runway Season II. Yakoranye n’abahanzi b’imideli bakomeye barimo Modupe Omonze, Shaleen Cheah, Helen Couture, Si Fashion Galerie na Khalid Al Ayoub.

Abamuzi bavuga ko yari umuntu ukunda kumurika imideli, akunda abantu kandi agashyira imbere gusenga.