RIB yavuze ko igiye gukurikirana abashyira amashusho y'urukozasoni bari hanze y'igihugu

RIB yavuze ko igiye gukurikirana abashyira amashusho y'urukozasoni bari hanze y'igihugu

Urwego rw’Igihugu rushinzwe Ubugenzacyaha [RIB], rwatangaje ko abashyira amashusho n’amafoto y’urukozasoni ku mbuga nkoranyambaga bari hanze y’u Rwanda nabo bashobora kuzakurikiranwa mu gihe ibyo bakora byaba bigira ingaruka ku banyarwanda.

Mu minsi ishize abakoresha imbuga nkoranyambaga bacitse ururondogoro abandi barumirwa nyuma y’uko umuhanzi w’Umunyarwandakazi, Ingabire Dorcas uzwi nka Sunny ashyize hanze amashusho y’urukozasoni yifashishije Instagram.

Uyu muhanzikazi wamamaye mu ndirimbo zirimo iyitwa ‘Kungola’ yakoranye na Bruce Melodie, kuri ubu ari kubarizwa mu gihugu cya Kenya nk’uko ajya abitangaza ndetse niho yari ari ubwo yashyiraga hanze mashusho binyuze mu kiganiro yakoze mu uryo bwa ‘Live’ kuri Instagram.

Sunny asa n’uwasembuye benshi dore ko nyuma ye hari abandi bakobwa batangira gukora ibi biganiro bambaye utwenda tw’imbere, abandi bakagera n’ubwo bakuramo imyenda yose bakereka ababakurikiye.

Uretse aba bavuba benshi bibuka umukobwa witwa Isimbi Noeline nawe wigeze gushyira hanze amafoto agaragaza ubwambure bwe, ibintu nabyo byavugishije benshi cyane bavuga ko bihabanye n’umuco nyarwanda ndetse abandi bakavuga ko yagakwiye kuba akurikiranwa ariko nawe ntabwo ari mu Rwanda.

Ubusanzwe amategeko ateganya ko nk’urugero niba umuntu akoze icyaha atari ku butaka bw’u Rwanda ariko cya cyaha kikagira ingaruka ku Rwanda n’abanyarwanda muri rusange aba ashobora gukurikiranwa.

Bivuze ko iki cyaha gifatwa nk’icyaha mpuzamahanga cyangwa icyambukiranya umupaka aho hifashishwa Polisi Mpuzamahanga mu gushakisha no guta muri yombi uwakoze icyo cyaha agafatirwa mu gihugu aba aherereyemo.

Umuvugizi w’Umusigire wa RIB, Dominique Bahorera yavuze ko n’ubwo ibi byaha bikorwa ababyishoramo baba bari hanze y’u Rwanda ariko mu gihe byagaragaye ko hari ingaruka bigira ku banyarwanda bashobora kuzakurikiranwa.

Yagize ati “Nubwo utabikorera ku butaka bw’u Rwanda ariko ukabikorera hanze y’igihugu bikagira ingaruka ku Rwanda, amategeko avuga ko ari ibyaha bifatwa nk’ibyaha mpuzamahanga cyangwa ibyambukiranya umupaka.”

Yakomeje agira ati “Hari uburyo busanzwe bukoreshwa mu gukurikirana abanyabyaha harimo no kwitabaza Polisi Mpuzamahanga tukaba twasaba ko bafatwa bagakurikiranwaho ibyo byaha kuko hafi y’ibihugu byose ibi bintu bifatwa nk’icyaha.”

RIB ivuga ko itazihanganira umuntu wese ugaragaza inyota yo gushyira hanze amashusho y’urukozasoni kuko amategeko abihana arahari kandi bigira ingaruka mbi ku rubyiruko kuko biruyobya bikaba byanarukururira ku gucuruzwa.

Ubusanzwe ku bari mu Rwanda ibikorwa nk’ibi byo gutangaza cyangwa gushyira hanze amashusho n’amafoto y’urukozasoni bahanwa n’ingingo ya 38 y’Itegeko No 60/2018 ryo ku wa 22/8/2018 ryerekeye gukumira no guhana ibyaha bikoresheje ikoranabuhanga.

Iyi ngingo ivuga ko umuntu wese, utangaza, wohereza cyangwa utuma hatangazwa ubutumwa ubwo ari bwo bwose bw’urukozasoni akoresheje mudasobwa cyangwa urusobe rwa mudasobwa, aba akoze icyaha.

Iyo abihamijwe n’urukiko, ahanishwa igifungo kitari munsi y’amezi atandatu, ariko kitarenze imyaka ibiri, n’ihazabu y’amafaranga y’u Rwanda atari munsi ya miliyoni imwe, ariko atarenze miliyoni ebyiri.

Iyo ubutumwa bw’urukozasoni buvugwa mu gika cya mbere cy’iyi ngingo budahuye n’ukuri cyangwa bureba umwana, uwahamwe n’icyaha ahanishwa igifungo kitari munsi y’imyaka itatu ariko kitarenze imyaka itanu, n’ihazabu y’amafaranga y’u Rwanda atari munsi ya miliyoni imwe ariko atarenze miliyoni eshatu.