Rubavu:Rya bagiro ryitambitse umuhesha w’ inkiko abariyoboraga bakatiwe gufungwa iminsi 30

Rubavu:Rya bagiro ryitambitse umuhesha w’ inkiko abariyoboraga bakatiwe gufungwa iminsi 30

Urukiko rwisumbuye rwa Gisenyi rwakatiye Mbanjimbere Faustin wari Perezida wa koperative na Rwango Jean Claude wari umunyamabanga waryo gufungwa iminsi 30.

Umwanzuro w’ urukiko ku ifungwa n’ ifungurwa ry’ agateganyo wasomwe kuri uyu wa 20 Ugushyingo 2019.

Umucamanza yavuze ko abaregwa barekuwe bakajya hanze batoroka ubutabera kuko hari bagenzi babo baareganwa batorotse ubutabera. Abatorotse ni Hakizimana Hassan na Nzabandora Theogene. Aba bari ba rwiyemezamirimo baregwa ubufatanyacyaha mu guhimba inyandiko mpimbano ihamya umwenda wa miliyoni 400.

Abaregwa bakurikiranweho kunyereza umutungo w’ Ibagiro rya Kijyambere rya Koperative KOADU [Dukunde Umurimo] riherereye mu Kagari Rutagara mu Karere ka Rubavu.

Mu iburanisha riheruka abaregwa bari basabye kurekurwa by’agateganyo batanga ingwate y’ umutungo utimukanwa.

Iki kibazo cyavuzwe cyane mu itangazamakuru ubwo abanyamuryango b’ iyi koperative bitambikaga umuhesha w’ inkiko bakanga ko ibagiro ryabo ritezwa cyamunara. Iri bagiro ryari rigiye gutezwa cyamunara kubera ideni rya miliyoni zirenga 400, abanyamuryango bavuga ko batazi imvano y’ iri deni.

Imiterere y’ ikibazo

Koperative Dukundumurimo, KOADU ni iy’ababazi 92 bakorera mu Karere ka Rubavu bishize hamwe buri munyamuryango atanga miliyoni 3 n’ ibihumbi 500. Ubusanzwe bafite ibagiro rifite ubushobozi bwo kubaga inka nibura 60 ku munsi bakinjiza nibura miliyoni zashoboraga kugera kuri 12 mu kwezi.

Ubuyobozi bw’ iyi koperative byagiye kuvaho ibagiro ritakirenza inka 30 cyangwa 40 ku kwezi bakinjiza miliyoni 9.

Koperative COADU yashinzwe mu 2009, igamije ububazi bw’inka. Mu 2012 ni bwo yatangiye kubaka ibagiro ryagombaga kurangira mu 2015 biza kugaragaramo ibibazo ku buryo mu 2016 ari bwo RCA yahagaritse komite yayiyoboraga nyuma yo gutahura uburiganya mu masoko yatangwaga mu myubakire y’ibagiro.
Aba batawe muri yombi bashinjwa uruhare mu guhimba inyandiko mpimbano yemezaga umwenda wa miliyoni 435 Frw, bakaba baragiye bigana imikono y’abanyamuryango.

Abanyamuryango banyuzwe n’ umwanzuro w’ urukiko

Magingo aya ubu iri bagiro riri kongera kwiyubaka, rifite komite nshya Mukanoheri Beatha abereye umunyamabanga.

Mukanoheri yatangaje ko nk’ abanyamuryango ba KOADU bishimiye umwanzuro w’ urukiko wo gufunga by’ agateganyo abari abayobozi ba KODAU kuko bafite bafite impungenge ko abaregwa barekuwe by’ agateganyo bahita batoroka nk’ uko bagenzi babo batorotse.