Rusesabagina yaba yarakoze ibyaha cyangwa atarabikoze agomba gusubizwa mu Bubibiligi- Inteko y’u Burayi yongeye yahagurutse

Rusesabagina yaba yarakoze ibyaha cyangwa atarabikoze agomba gusubizwa mu Bubibiligi- Inteko y’u Burayi yongeye yahagurutse

Inteko Ishinga Amategeko y’Umuryango w’Ubumwe bw’u Burayi yatoye ingingo ivuga ko "Paul Rusesabagina ari urugero rw’ibikorwa byo guhonyora uburenganzira bwa muntu mu Rwanda", isaba ko agomba kurekurwa ngo kabone nubwo yaba yarakoze ibyaha ashinjwa.

Ni ingingo yemejwe n’Inteko ishinga amategeko kuri uyu wa Kane tariki 07 Ukwakira 2021 ubwo abagize iriya Nteko bateranaga.

Inteko sihinga Amategeko y’Umuryango w’u Burayi si ubwa mbere ihagurutse kuri iki kibazo cya Paul Rusesabagina wagize uruhare rukomeye mu bikorwa by’ibitero byagabwe mu Rwanda bikanahitana bamwe mu Banyarwanda barengana.

Iyi Nteko Ishinga Amategeko yakunze gusaba u Rwanda kurekura uyu mugabo ngo kuko itizeye ubutabera rw’u Rwanda ndetse ko ngo Rusesabagina yafashwe mu buryo bunyuranyije n’amategeko gusa Guverinoma y’u Rwanda yo yakunze kugaragaza ko uyu uregwa ibyaha bikomeye yageze mu Rwanda mu nzira zinyuze mu mategeko ndetse ko akwiye kuryozwa ibyaha ashinjwa.

Kuri uyu wa kane ubwo batoraga iriya ngingo, Abadepite 660 bayitoye naho babiri barayanga mu gihe 18 bifashe. Bivuze ko iyo ngingo yatowe ku bwigaze buri hejuru.

Ni ingingo ivuga ko “Rusesabagina ni urugero rw’ibikorwa byo guhonyora uburenganzira bwa muntu mu Rwanda.”

Ikinyamakuru Le Soir cyo mu Bubiligi dukesha iyi nkuru, kivuga ko umwanzuro w’iriya nteko uvuga ko Rusesabagina agomba gusubizwa mu Gihugu cye [u Bubiligi] “hatitawe ku kuba ahamwa n’ibyaha cyangwa ari umwere.”

Umuvugizi wa Guverinoma y’u Rwanda, Yolande Makolo yavuze atumva impamvu abagize Inteko Ishinga Amategeko y’Umuryango w’Ubumwe bw’u Burayi bavugira Rusesabagina ariko bakibagirwa ko akurikiranywe hamwe n’abandi bantu.

Mu butumwa yanyujije kuri Twitter, Yolande Makolo wabaye nk’ubaza yagize ati “Hanyuma abafatanyije ibyaha na Rusesabagina ko ntacyo babavuzeho ? Ntarukundo rw’abadepite bafitiye abandi bantu 20 bahamijwe ibyaha bya FLN ?”

Paul Rusesabagina mu maburanisha ye atarikura mu rubanza, yakunze kugaragaza ko atari Umunyarwanda ahubwo ko ari Umubiligi gusa Ubushinjacyaha baburana bwerekanye ibimenyetso simusiga ko uyu mugabo kabone nubwo afite ubwenegihugu bwa kabiri bw’u Bubiligi ariko ko akiri Umunyarwanda nk’umwenegihugu w’Ivuko.

Ubushinjacyaha bwanavugaga ko kabone nubwo Rusesabagina yaba atari Umunyarwanda ariko ibyo ashinjwa byarakorewe ku butaka bw’u Rwanda ndetse bikagira ingaruka ku Banyarwanda, ntakibuza inkiko z’u Rwanda kumuburanisha.

Guverinoma y’u Rwanda kandi yakunze kuvuga ko imiryango n’ibihugu bisaba ko Uburenganzira bwa Rusesabagina bwubahirizwa, bakwiye kwibuka ko n’abagizweho ingaruka n’ibikorwa akurikiranyweho na bo ari abantu bakeneye uburenganzira bwo guhabwa ubutabera.

Mu kiganiro cyatambutse kuri France 24 muri Gicurasi 2021, Perezida Kagame Paul yavuze ko na we ari mu bantu bifuza ko Rusesabagina ahabwa ubutabera buboneye.

Icyo gihe yagize ati “Nanjye ubwanjye ndashaka kubona urubanza rutabogamye. Kuki mutekereza ko kutabogama ari iby’i Burayi cyangwa Amerika cyangwa abandi batari twe ? Ni nk’aho kugira ngo u Rwanda cyangwa Africa ntibibogame bigomba kuba bihagarikiwe n’u Burayi cyangwa Amerika cyangwa ahandi. Oya. Oya rwose.”

Ubwo Rusesabagina Paul yahanishwaga igifungo cy’imyaka 25, abaturage bo mu bice byakozweho cyane n’ibitero bya MRCD-FLN bagaragaje ko kiriya gihano kitabanyuze kubera ubukana bw’ibikorwa bazi byakozwe n’inyeshyamba zatewe inkunga n’uriya mugabo.