Rusizi: Ahaherutse kwicirwa umugore, hiciwe undi utwite inda y’amezi 6

Rusizi: Ahaherutse kwicirwa umugore, hiciwe undi utwite inda y’amezi 6

Kuri iki cyumweru,tariki 12 Mutarama, saa kumi n’ebyiri z’igitondo ni bwo abaturage b’Umurenge wa Giheke mu karere ka Rusizi baramukirijweho inkuru y’iyicwa rya Bayavuge Béatrice w’imyaka 44, wari utuye mu Mudugudu wa Rwamiko, Akagari ka Kigenge akaba yiciwe mu ishyamba riri hafi y’urugo rwe, mu bilometero 3 gusa uvuye aho mugenzi we Mukakaberuka Vestine w’imyaka 45 aherutse kwicirwa,hafi ya kaminuza y’u Rwanda,ishami rya Rusizi.

Bamwe mu baturage b’aka Kagari bari mu batabaye mbere, batangarije Bwiza.com ko uyu Bayavuge Béatrice wiciwe muri iri shyamba ataha iwe mu rugo mu ma saa kumi n’ebyiri n’igice z’umugoroba zo ku wa gatandatu tariki 11 Mutarama,ngo basanze abamwishe bamunize banamwambitse ubusa.


Ishyamba Bayavuge yiciwemo

Aba bakurikije uko basanze ameze ngo bakanakeka ko abamwishe babanje kumusambanya barangiza bakanamwangiza imyanya ndangagitsina,bakanavuga ko bimwe mu bice by’imyanya ndangagitsina ye ngo aba bagizi ba nabi baba babimukuyemo bakabitwara.

Iby’ubu bushinyaguzi biravugwa n’abaturage gusa nta rundi rwego rwabyemeje, icyakora bose ngo basanze umwe mu myenda yari yambaye ari wo bakingirijeho indi imurambitse iruhande.

Umwe muri bo ati " Twasanze yambaye ubusa, umwe mu myenda yari yambaye bawukinze ku myanya ye ndangagitsina kandi uriho amaraso ndetse na bimwe mu bice bye by’iyi myanya ndangagitsina bitaboneka,gusa urumva ko tutabyitegereje neza ariko turabikeka,ubwo wenda ubwo yahise ajyanwa mu bitaro bya Gihundwe mbere yo gushyingurwa abaganga baratumara izo mpungenge ,ariko ni uko twabisanze.’’

Mukamazimpaka Goretti, murumuna wa nyirabukwe wa nyakwigendera bivugwa ko yishwe ari we avuye gusura, yabwiye Bwiza.com ko nyakwigendera yamugezeho ku wa 6 saa moya z’igitondo aje kumusura, ahava saa cyenda n’igice z’igicamunsi ariko avuga ko yumva afite ubwoba bwinshi mu mutima, adatekanye.


Bayavuye (uwa kabiri uhereye iburyo) n’umuryango we.

Uyu yamuhaye ibyo ashyira abana birimo n’isombe idasekuye, ngo aca iwabo kureba ko hari ufite telefoni ngo bamuhamagarire umugabo we aze ku mutwaza no kumucisha muri iryo shyamba ngo yumvaga afitiye ubwoba bwinshi.

Ati’’ Ni aho twaherukaniye n’iwabo ntiyahatinze uretse gusekuza iyo sombe nari muhaye gusa nongeye kumva bampamagara ngo yishwe,nkurikije n’ukuntu yambwiraga ko yiyumvamo ubwoba bwinshi ndumva nanjye byanteye ubwoba bwinshi mu mutima,sintekanye.’’

Abaturage benshi baganiriye na Bwiza.com,bavuze ko aba bashobora kuba atari abajura basanzwe kuko bategera henshi mu mashyamba y’imirenge ya Gihundwe na Giheke, ngo hari abo batega bakabambura abandi banabaha ku neza amatelefoni cyangwa amafaranga bakayanga bagashaka ahubwo kubica.

Bafite impungenge y’uko abana babo bazajya bajya ku ishuri banyuze muri ibyo bice.

Uyu ati ’’ Biraba amashuri amaze gutangira kandi aho banyura bajya kwiga ni na ho abo bagome bategera. Ubu se tuzabigenza dute? Tuzajya tubaherekeza se nta mwanya,turabajyana kure y’aho bigaga se kandi na ho ari mu mashyamba gusa,turakora iki koko ko ubu imitima yacu itakiri mu gitereko?’’

Umunyamabanga Nshigwabikorwa w’Akagari ka Kigenge, Nyiraneza Annonciatha,avuga ko iri shyamba rireshya na hegitari 38 uyu mugore yiciwemo ari ryo ririmo inzira yonyine ya bugufi abenshi mu baturage bacamo bagiye kwaka serivisi ku kagari. Kuba umurambo we wasanzwe ku nzira kuri metero 50 gusa uvuye ku muhanda munini wa kaburimbo Rusizi-Huye yishwe urw’agashinyaguro mu cyumweru kimwe n’urwo mugenzi we yishwe kandi ahantu hegeranye, bitabura gutera abaturage ubwoba.

Uyu muyobozi arasaba akarere ko kahashyira uburyo bwihariye bwo kurinda umutekano w’abaturage cyangwa ayo mashyamba akavaho,dore ko hari n’amaze imyaka irenga 60 adasarurwa yabaye ibihuru gusa.

Umuyobozi w’Akarere ka Rusizi,Kayumba Ephrem yavuze ko nyuma yo kubona izi mfu zombi,zimeze kimwe mu bihe bimwe bahafatiye ingamba z’umutekano zihariye.

Ati "Ababikora ntiturabafata ariko turi kubahiga bukware kuzageza tubabonye,icya kabiri ni uko twatangiye kuhashyira abapolisi, abasirikare n’izindi nzego z’umutekano nk’uko bimeze muri Nyungwe."

Ku ngingo y’abavuga ko abakora ubu bugizi bwa nabi baba ari abanzi b’igihugu, Meya Kayumba ati " Kubihuza no kuvuga ko baba ari abanzi b’igihugu bahatera byo si byo, turasaba n’abaturage kwicungira umutekano no gutanga amakuru ku gihe,igihe cyose baketse icyawuhungabanya.’’

Nyakwigendera asize abana 8 barimo batatu yabyaranye n’umugabo yari afite mbere na batanu yabyaranye n’uwo yari afite ubu,akaba yashyinguwe ukubiri n’iyo nda yapfanye,kwa muganga bamaze kuyimukuramo.


Abaturanyi ba Bayavuge basigaye mu gahinda

Muri rusange imfu z’aba bagore biciwe muri aka gace zimaze gutera ubwoaba abaturage. Bavuga ko kuba inzego z’ubuyobozi zivuga ko zitarabina abica aba bantu bibateye impungenge.