Rusizi: Umugabo akurikiranweho kubikira umugore we asinziriye akamwica

Rusizi: Umugabo akurikiranweho kubikira umugore we asinziriye akamwica

Urukiko Rwisumbuye rwa Rusizi rwaburanishirije ahakorewe icyaha mu Kagari ka Nyange, Umurenge wa Bugarama, Akarere ka Rusizi, umugabo witwa Harerimana Anastase ukurikiranweho  n’Ubushinjacyaha  icyaha cyo kwica umugore we amukubise ishoka, aho Ubushinjacyaha bwamusabiye igihano cy’igifungo cya burundu.

Ni iburanisha ryabaye kuwa Mbere, itariki 15 Ukwakira 2019, mu rubanza Urukiko Rwisumbuye rwa Rusizi rukurikiranyeho uwitwa Harerimana Anastase icyaha cyo kwica umugore we akoresheje ishoka.

Icyaha kikaba cyarakorewe  mu Kagari ka Nyange, Umurenge wa Bugarama, Akarere ka Rusizi, mu ijoro ryo ku wa 26/09/2019 ubwo uyu mugabo witwa Harerimana Anastase yacunze umugore we aryamye, aramwubikira  amukubita ishoka mu mutwe aramwica ; Yahise  atoroka ariko bukeye bwaho yaje gufatirwa mu murenge wa Nyakabuye .

Ubushinjacyaha bwamusabiye igihano cy’igifungo cya burundu nk’uko iyi nkuru dukesha Ubushinjacyaha bukuru ikomeza ivuga.

Mu kwiregura kwe Harerimana Anastase yemeye icyaha asobanura ko yabitewe n’uko yakekaga ko umugore we yamucaga inyuma.

Umushinjacyaha ashingiye ku ngingo ya 107 y’itegeko NO 68/2018 ryo ku wa 30/08/2018 riteganya ibyaha n’ibihano muri rusange yasabiye Harerimana Anastase igihano cy’igifungo cya burundu anasaba Urukiko kutita ku mpamvu iyo ariyo yose yatuma uregwa agabanyirizwa igihano.