Samwel Eto'o abona Messi na Christiano baravuye ku wundi mugabane

Samwel Eto'o abona Messi na Christiano baravuye ku wundi mugabane

Samuel Eto’o wabaye umukinnyi ukomeye mu makipe arimo FC Barcelone, Inter Milan na Chelsea, yavuze ko Cristiano Ronaldo na Lionel Messi bafatwa nk’abakinnyi ba mbere ku Isi bavuye ku wundi mubumbe.

Samuel Eto’o wasezeye gukina umupira w’amaguru mu 2019, kuri ubu ni umwe mu ba ambasaderi b’Igikombe cy’Isi cya Qatar 2022 ndetse asanzwe ari Umujyanama wa Perezida wa CAF, Ahmad Ahmad.

Aganira n’itangazamakuru ryo muri Qatar, Samuel Eto’o yabajijwe niba yumva hari undi mukinnyi ukomoka muri Afurika uzegukana Ballon d’Or nk’uko Umunya-Liberia George Weah yabikoze mu 1995.

Mu gusubiza, Eto’o yavuze ko biterwa n’abatora, ariko Cristiano Ronaldo na Lionel Messi bihariye kuko bavuye ku wundi mubumbe.

Ati “Biterwa n’abatora. Hari bamwe mu Banyafurika batemera abakinnyi bo ku mugabane wabo, ibyo biba muri Afurika gusa. Urebye mu myaka ya vuba, mpora mvuga ko Messi ari we mukinnyi mwiza ku Isi yose, akurikiwe na Cristiano Ronaldo. Ntekereza ko ari abo ku wundi mubumbe.”

“Uretse ibyo, muri iyi myaka, hari abakinnyi bakoze ikinyuranyo nka Sadio Mané. Yatsinze ibitego mu marushanwa yose, ariko umusaruro wabaye ko atatwara Ballon d’Or. Kubera iki? Kubera ko abatora bakeka ko umukinnyi mwiza aba afite igisobanuro cyihariye, agomba kuva ku wundi mugabane utari uwacu. Niyo mpamvu dutsindwa.”

Samuel Eto’o afatwa nk’umwe mu bakinnyi b’umupira w’amaguru beza Afurika yagize ndetse yabaye Umukinnyi w’Umwaka muri Afurika inshuro enye.

Yihariye agahigo ko kuba ari we mukinnyi watsindiye Cameroun ibitego byinshi mu mateka yayo ndetse akaba ari mukinnyi watsinze ibitego byinshi mu mateka y’Igikombe cya Afurika.