Shaddy Boo yatamaje abavugaga ko afunzwe

Shaddy Boo yatamaje abavugaga ko afunzwe

Hamaze iminsi hasakazwa amakuru avuga ko Mbabazi Shadia umaze kwamamara ku mbuga nkoranyambaga nka Shaddy Boo, yaba afungiwe muri Denmark azira gucuruza ibiyobwenge.

Izi nkuru zakwirakwiye kuri Instagram guhera ku gicamunsi cyo ku Cyumweru gishize, ababivugaga bakemeza ko uyu mubyeyi amaze igihe afunzwe, ko hari undi mukobwa urimo gukoresha imbuga nkoranyambaga ze.

Mu kunyomoza ibi, Shaddy Boo kuri uwo munsi yanditse ku rukuta rwe rwa Instagram ariko uwakwirakwizaga ayo makuru akomeza gutsimbarara, yemeza ko afite “amakuru nyayo yemeza ko uyu mugore afunzwe”, ahubwo agasaba abamukunda kumusengera n’abari hafi ye bakamugemurira.

Shaddy Boo ngo yari arembejwe n’abantu bamuhamagara buri munsi bamubaza niba afunzwe abandi bakamwandikira ubutumwa bugufi no kuri WhatsApp, bagatungurwa no kubona abasubije, ariko bakongera kwigarura bumva ko ari wa mukobwa wavugwaga ko ari gukoresha imbuga nkoranyamabaga ze.

Mu gitondo cyo kuri uyu wa Mbere, Shaddy Boo yanditse ku rukuta rwe rwa Instagram ko ibiri kuvugwa nta shingiro bifite ndetse atiyumvisha uburyo umuntu ahimba ikinyoma nka kiriya.

Ati “Abari kumpamagara n’abanyandikira nababwira ko meze neza, mureke guhangayika. Kandi ntabwo nshaka kujya ‘live’ ngo nereke abanzi banjye ko ntafunze, ukuri kuzahora ari ukuri.”

Kuri uyu wa Kabiri Shaddy Boo yabishyizeho iherezo nk’uko yari amaze iminsi abisabwa, maze ajya ku rukuta rwe rwa Instagram ‘live’, anyomoza ayo makuru yari amaze iminsi akwirakwizwa.

Ati “Ndi muri Kigali, cyangwa mbahe imyirondoro y’aho mperereye? Njye navugaga ngo ahari kuvuga ayo makuru babitewe n’uko ntaheruka gushyira amafoto kuri Instagram. Ndi mu rugo iwanjye, ntabwo nzi na gereza ukuntu isa, kandi Imana izanayindinde, umuntu ukwifuriza gufungwa aba akwanga.”

Shaddy Boo yakomeje avuga byari bikabije, yemeza ko atazi ikintu yaba yarakoreye uwo muntu wakwizaga aya makuru ku buryo bigera aho kumwifuriza gufungwa.

Agaragara nk’uwatangaye ati “niba ari ukubaka izina akeneye simbizi! Igihe yahereye avuga narabyihanganiye ariko kugeza aho avuga ngo ndafunzwe nabonye ko harimo n’urwango rukomeye.”

Yakomeje avuga ko uyu muntu wamusebyaga yekerekana ubutumwa bw’abantu batandukanye bamwandikiye bahamya ko Shaddy Boo afunze, yemezaga ko yabeshyaga ko yandikiwe kandi ariwe uri kubwiyandikira.

Ku munsi w’ababyeyi b’abagore ku Cyumweru tariki 12 Gicurasi 2019, Shaddy Boo yanditse avuga ukuntu yabyaye akiri muto (afite imyaka 19) bikabanza kumugora kurera abana be, avuga ko hari abumvaga ko atazarera ngo bimukundire ariko yishimira kuba umubyeyi utewe ishema no kubona abana be bakura.

Nyuma yo kwandika ibi, nibwo hasakajwe amakuru avuga ko yafungiwe muri Denmark nyamara ari mu rugo rwe i Kibagabaga aho abana n’abana be.

Hakwirakwijwe inkuru z'uko Shaddy Boo afungiwe ibiyobyabwenge nyamara yibereye mu rugo iwe atekanye

Ku Cyumweru Shaddy Boo yari yanditse kuri Instagram avuga ku miruho yahuye nayo ubwo yabyaraga akiri muto

Shaddy Boo yasabye Imana kumurinda kuzigera afungwa