Tanzania: Iperereza ryagaragaje ko imashini yifashishwaga mu gupima Covid-19 ifite ikibazo bo bakavuga ko yashize

Tanzania: Iperereza ryagaragaje ko imashini yifashishwaga mu gupima Covid-19 ifite ikibazo bo bakavuga ko yashize

Minisitiri w’Ubuzima muri iki gihugu, Dr Ummy Mwalimu, yatangaje ko iperereza ryakozwe nyuma y’aho Perezida John Pombe Magufuli agize amakenga ku mikorere y’imashini zifashishwa mu gupima Covid-19.

Mu minsi yashize ubwo yakiraga indahiro ya Minisitiri mushya ushinzwe itegekonshinga n’andi mategeko, Perezida Magufuli yagaragaje ko hari amatungo n’ibimera bapimye bagasanga na byo byaranduye Covid-19, arshimangira ko bishoboka cyane kuba hari Abantu babwirwa ko banduye Covid-19 nyamara ari bazima.

Umukuru w’igihugu cya Tanzania yagaragaje ko niba ikibazo kitari muri Laboratwari, gishobora kuba gifitwe n’abayikoramo badafite ubumenyi bwo gupima Coronavirus.

Minisitiri Ummy yasobanuye ko nyuma y’uko itsinda ryashyizweho na Guverinoma ya Tanzania rirangije iperereza ryaryo, ryasanze hari ikibazo cy’ubunyamwuga mu gupima Covid-19.

Iperereza ryagaragaje ko intege nke ziri mu bikoresho byifashishwa mu gupima kiriya cyorezo.

Yagize ati"Komite yagaragaje ko hari imbogamizi zishingiye ku bibazo bya tekiniki by’ibikoresho n’ubuziranenge bw’ibisubizo."

Mu rwego rwo gushakira umuti kiriya kibazo, Minisitiri Ummy yavuze ko ikigiye gukurikiraho ari ugupimira Covid-19 mu yindi Laboratwari nshya ifite ibikoresho bigezweho n’ubushobozi bwo gupima byibura ibipimo 1800 ku munsi, itandukanye n’iyo bakoreshaga isuzuma ibipimo 300 byonyine mu masaha 24.

Imibare ijyanye na Coronavirus Tanzania iheruka gushyira ahagaragara mu kwezi gushize, igaragaza ko muri iki gihugu habarurwa abantu 509 banduye kiriya cyorezo, barimo 21 cyishe.

What's Your Reaction?

like
0
dislike
0
love
0
funny
0
angry
0
sad
0
wow
0