Tanzania yashyizeho amabwiriza y’ikoreshwa ry’udupfukamunwa ku bigo by’amashuri yasubukuwe

Tanzania yashyizeho amabwiriza y’ikoreshwa ry’udupfukamunwa ku bigo by’amashuri yasubukuwe

Guverinoma ya Tanzania, yashyizeho amabwiriza mashya agomba gukurikizwa n’ibigo by’amashuri makuru byose guhera kuri uyu wa Mbere ubwo yongerega kuyafungurira imiryango ngo asubukure ibikorwa.

Amwe muri ayo mabwiriza harimo ko abanyeshuri bari munsi y’imyaka umunani bafite ibibazo by’ubuhumekero nk’uburwayi bwa asthma, umutima n’ubundi nk’ubwo batagomba kwambara udupfukamunwa.

Minisitiri w’Ubuzima, Ummy Mwalimu, yatangaje ko mu gihe umunyeshuri arwaye cyangwa agize ibibazo by’ubuhumekero, agomba kwirinda kujya ahantu hari abantu benshi, ndetse n’uwambaye agapfukamunwa akagakuramo kugira ngo abone umwuka umufasha guhumeka neza, kandi akihutira gusaba ubufasha.

Yavuze kandi ko abanyeshuri batagomba kwambara udupfukamunwa mu gihe bari mu bikorwa bisaba ingufu nko kwiruka n’indi mikino. Yategetse ko amashuri asukurwa mu buryo bufatika, ndetse hagashyirwaho ahantu ho gukarabira intoki.

Umunyeshuri wese ugaragaje ibimenyetso bya Coronavirus, ababyeyi n’abarezi basabwe guhita babimenyesha inzego zibishinzwe agahita apimwa. Iyi minisiteri yashimangiye kandi ko izajya ikora igenzura rihoraho mu kureba ko ibi byose byubahirizwa.

Tanzania ni kimwe mu bihugu byagenze biguru ntege mu ngamba zo kurwanya icyorezo cya Coronavirus ugereranyije n’ibindi, aho cyageze n’aho gihagarika ibikorwa byo gupima nyuma y’aho Perezida Magufuli anengeye ibikoresho byifashishwa.

Ubu habarurwa abantu 509 banduye Coronavirus barimo 21 bitabye Imana.